Шымкент жолшылары асарлатып ауқымды жұмыс атқарды

Шымкенттік жолшылар ежелден келе жатқан тиімді әдістің арқасында біраз шаруаның басын қайырды. Арыс-1 станциясында асар әдісімен ауқымды жұмыс атқарылып, екі күнде 400 астам ағаш шпал темір-бетонға алмастырылды.

Шымкент магистральдық желі бөлімшесінің директоры Алғазы Қойлыбаев бекіткен жоспарға сай қолға алынған жұмысқа Арыс жол дистанциясының барлық айналымдағы бригадалары, жол жөндеушілер түгел қатысты. Екі күнге жоспарланған жұмысқа 130-дан астам жолшы жұмылдырылып, тозығы жеткен ағаш шпалдардың орнына кәсіпорын балансында тұрған темір-бетон шпалдар төселіп, рельс пен шпалдың беріктігін қатыруда КБ бекітпесі қолданылған.  

Мамандардың түсіндіруінше, бұл жоба көктемгі тексеріс нәтижесінде анықталған кемшілікті жою мақсатында және станцияішілік жолдардың жағдайын жақсарту мақсатында іске асырылған.  

Дистанцияның бас инженері Думан Асылханұлының айтуынша, жұмыс басталмас бұрын нақты жоспар құрылып, тыңғылықты дайындық жұмыстары жүргізілген. Материалдық-техникалық құрал-жабдықтармен қамтамасыз етуден бөлек, жұмыс кестесі түзіліп, әр топқа бөлініп берілген. Жұмыс барысында станция паркіндегі №4 пен №64 жол аралығында жолдардан бөлек, 4 бағыттағыш бұрмалар аралығындағы шпалдардың кейбірі жаңартылды.  

– Бас-аяғы 400 шпал ауыстырылған болса, оның ішінде ең көбі №64 жолда – 56 шпал, ал №4 пен №52 жолдың әрбірінде 26 шпалдан ауыстырылды. Сол сияқты №160 пен №144 бағыттағыш бұрма аралығына 30 темір-бетон шпал төселді. Бұл жерде әрине жұмыс көлеміне қарай жұмысшы саны да бөлінгендігін ескеру керек. Мәселен, ең көп шпал ауысқан №64 жолда 19 жолшы жұмыс істеді, – дейді асарлатып істелген ауқымды жұмыстың басы-қасында жүрген ПЧ-54 мекемесінің бастығы Ғалымжан Ғазезұлы.  

Екі күнге жалғасқан ауқымды жұмыс толаскез санатына жатпайды. Тек, станция паркінде тұрған вагондарды реттеп, жөнделуі тиіс жолдарды ашу арқылы жүзеге асырылған. Сондықтан да, пойыз қозғалысы мен жүріп-тұруына ешқандай кедергі келмеген. Айрықша атап өтерлігі сол, мұнда біртіндеп ауыстыру әдісі қолданылған. Яғни, әрбір 4-ші ағаш шпал алынып, орнына темір-бетон шпал салынған.  

Жолшылардың ауқымды жобаны жүзеге асыруына «Қазкөліккәсіп» ҚБ Шымкент филиалы ұжымы да қол ұшын созып, көмек көрсетті. Олар аймақтардан келіп жұмыс істеп жатқан жұмысшыларға ас-су жеткізіп беріп жағдайын жасады. Дистанция бастығының орынбасары Икрам Еркінбекұлының айтуынша, аптап ыстыққа қарамай екі тәулік бойы еңбек еткен жолшыларға арнап 30 келі палау әзірленіп, 150 литр салқын сусын ұсынылған.