Шымкенттегі теміржол өткелінде төрт жолақты көпір құрылысы қарқын алды

Осы күндері Шымкент қаласының аумағына кіретін күзетпелі 3 теміржол өткелі бар болса, соның бірінде ауқымды жұмыстар қолға алынған. Бүгінде Сайрамға қарай шыға берістегі күзетпелі өтпеде құрылыс жұмыстары бұрқ-сарқ қайнауда.

Бұл өткел ел аузында «Қазбакалейторг» аталса, теміржолшылар үшін 3 294 шақырымдағы автокөлік жолымен түйісетін өтпе. Қала әкімінің тапсырысымен автокөліктерге арналған төрт жолақты даңғыл көпір теміржол үстінен өтетін болады. Сала мамандарының айтуынша, нысанды жыл соңына қарай қолданысқа беру жоспарланған.  

Шымкент жол дистанциясының бас инженері Нұрсұлтан Дүйсебаевтың айтуынша, 3 294 шақырымның 9-пикетіндегі күзетпелі бақылау бекеті ресми құжат бойынша І санатқа жатады. Шымкент қаласы мен халқы тығыз орналасқан Сайрам ауданы тұрғындары қалаға қатынайтын негізгі жол. Мұнда тәулігіне 12 мыңнан астам көлік пен түрлі санатты 60-қа жуық жылжымалы құрам өтеді.  

Тәуліктік қозғалыс белсенділігі жоғары нысан болғандықтан жергілікті билік осы маңға көпір салу жөнінде шешім қабылдап, оны «Береке-А» құрылыс корпорациясы іске асыратын болып шешім қабылданған. Өткен жылдың екінші жартысынан бастап коммуникациялық желілерді реттеу жұмыстары Шымкент жол дистанциясының мамандарымен бірлесе қолға алынып, 2-3 ай ішінде жоспар ойдағыдай орындалған.  

Қазіргі кезде аталған құрылыс нысанында өте күрделі бөліктерінің 75-80 пайызы сәтті іске асырылды. Құрылысқа жұмылдырылған 100-ге жуық жұмысшының 40-қа жуығы арнайы техникаларды тізгіндейтін механизаторлар. Жұмыс жоспарға сай жүргізілуде. Жуырда ғана темір жол үстінен өтетін 3 шақырымға жуық асфальт жолдың астындағы көпірдің 3 қатарлы 3 тіреу колоннасының негізі деп танылатын баған-қабырғаның үшеуі тұрғызылды. Сөйтіп, қос тараптан түбі нықтап тұрғызылған баған үстіне 42 метрлік темірбетонды балкалар орнатылды.  

– Осы балкаларды орнату үшін теміржол мекемесінің жетекшілерінен аталған құрылыс аумағындағы теміржол қозғалысын 72 сағатқа тоқтату туралы сұраныс хат жібергенбіз. Олардың әбжіл әрекетінің арқасында біз жоспарланған жұмысты мерзімінен бұрын, 2 тәулік ішінде орындап шықтық, – дейді «Береке-А» құрылыс корпорациясының прорабы Әділбай Сарымбетов.

Қазіргі кезде оңтүстікте 40-50 градус аптап ыстық. Бұл жағдай жұмыс қарқынын баяулатып, құрылысшыларға салмақ салатыны рас. Ендігі кезекте қалған 2 қатарлы бетонды бағаналарды тұрғызып, үстіне жабынды балкалар орнатылады. Бұл – құрылыс нысанындағы келесі еңсерілуі тиіс кезең. Содан соң бетонды қабырғалар арқылы жол биікке көтеріліп, өтпенің оңтүстік тұсында арнайы айналма жолдар салынады. Ал солтүстік тұсындағы автокөлік жолдары темір жолды жағалай көпір астымен төселеді және төртжолақты теміржол өтпесінің қос қапталында жаяу жүргіншілерге арналған жол болады.