Ақтөбеде жеті разъездің құрылысы басталды
Ақтөбе облысы бойынша меншікті тілші
Ақтөбе жүк тасымалы бөлімшесінің жартыжылдық жоспар көрсеткіші жақсы. Қолдағы деректерге сүйенсек, 8 пайдалану көрсеткішінің 5-еуі орындалған. Тәулігіне 349 вагоннан жүк түсірілген.
Ақтөбе ЖТ бөлімі 2025 жылдың бірінші жартыжылдығында техникалық жоспарды 100 пайыздан жоғары орындады. Пайдалану көрсеткіштерін орындаудың оң динамикасы кіріс көрсеткішін арттырды. Жүк айналымы 3,9 пайызға ұлғайды. Сәйкесінше, кіріс өткен жылмен салыстырғанда 45,8 пайызға артық. Жүктерді тиеу көлемі 8 млн 213 мың тоннаны құрады, бұл абсолюттік шамада 183 мың тоннаға артық.
Жүк тиеу жұмыстарының дені 93,8 пайызы ірі кәсіпорындар мен ұйымдардың үлесіне тиесілі. Оның ішінде 6,2 пайызы шетелге тасымалданды. Осылайша жүктерді тиеу көрсеткіші 102,3 %, статикалық жүктеме 100,6 %-ға жетті.
Тиелген жүктің негізгі үлесі құрылыс жүктеріне тиесілі – 43,6%, темір – 23,0%, түсті кен – 17,7%, мұнай – 5,1%, қара металдар – 4,0%, химиялық заттар – 1,1%, астық – 0,9%, басқа жүктер 4,2% құрайды.
Тәуліктік тапсырма бойынша тәулігіне 343 вагон жүк түсірілу міндеттелсе, іс жүзінде тәулігіне 349 вагоннан түсірілді.
Ақтөбе ЖТ бөлімшесінің директоры Бөріхан Беркімбаевтың айтуынша, биыл көп жылдық «2027 жылға дейін теміржол инфрақұрылымының өткізу қабілетін дамыту бағдарламасы» жасалған. Оның шеңберінде автоблоктау жүйесі мен Қандыағаш – Никельтау – Әйтеке би учаскесінде жаңа 7 разъезд құрылысының басталуы маңызды оқиға екені аталып отыр. Бұл учаскенің өткізу қабілетін 2 есеге арттыруға мүмкіндік береді.
«Бүгінгі таңда жаңа разъездердің құрылыс орындары анықталды. Разъездердің 8 бағыттамалық бұрмаларын салу және төсеу, разъездердің жер төсемін орнату бойынша жұмыстар жүргізілді. Жоса станциясы бойынша қосымша жол, сондай-ақ №191 разъездің жер төсемін орнату жұмыстары басталды. Сонымен қатар Никельтау станциясы бойынша айналма жол құрылысы жүреді. Бұл Қандыағаш – Никельтау – Әйтеке би полигонындағы жүк және жолаушылар пойыздарының өткізу қабілетін арттырады, – деді Бөріхан Беркімбаев.
Сонымен қатар жиында еңбек қауіпсіздігі және еңбекті қорғау компания үшін басымдықтардың бірі екені аталды. Биыл апатты жағдай тіркелмеді. Сәйкесінше, қозғалыс қауіпсіздігін жақсартуға бағытталған шаралардың жалғасатыны сөз болды.