Жабық жол қайта ашылды
Түркістан облысы бойынша меншікті тілші
Арыс станциясындағы 1-ші және 2-ші перегонды жағалай орналасқан «Серпантин» деп аталатын жол учаскесінің тақ жолы ресми түрде қайта іске қосылды. Станцияға келген пойыздарды бірден «Д» паркіне жалғайтын бұл жол – өңірдегі теміржол саласының жұмысын оңтайландырып, пойыздарды сұрыптау үдерісін жеделдетуге бағытталған маңызды қадам.
Нақтылап айтқанда, енді Шымкенттен келген пойыздардың «Д» паркіне тікелей кіру мүмкіндігі пайда болды. Яғни бұрынғыдай Арыс-2 арқылы өтіп, Арыс-1 станциясының орталық паркінде есепке алыну, тепловозға тіркелу және қайтадан «Д» паркіне жеткізу сияқты ұзақ әрі күрделі процесс енді қажет емес.
ПЧ-54 мекемесінің бас инженері әрі жобаның жүзеге асуына жетекшілік еткен Думан Додабаевтың айтуынша, жаңа жол вагон сұрыптау жұмысының технологиялық тізбегін толық оңтайландырып отыр.
– Бұрын пойыз станцияны аралап, қосымша маневрлер жасайтын. Бұл уақытты да, адам күшін де көп талап ететін. Вагондардың жылжып кетпеуіне байланысты башмак қою, оларды қайта жинау, вагон қараушылардың жұмысы – барлығы үлкен міндет еді. Ал енді пойыздар осы жол арқылы бірден «Д» паркінің сұрыптау дөңесіне кіріп келеді де, сол жерде дереу таратылып, тиісті пойыздар құрастырылады. Бұл – қызметтің тиімділігін арттырған озық технология, – дейді бас инженер.
1993 жылдан бері қолданылмай, қараусыз қалған бұл жол биыл толық қалпына келтірілді. Жөндеу жұмыстары Шымкент-Арыс-2 жолының 1-шақырымының 2-пикетінен бастап, 3-шақырымның 8-пикетіне дейінгі 2353 метр аралықты қамтыды.
Техникалық талаптарға сай болуы үшін учаскеге екі жиынтық бағыттағыш бұрма орнатылып, пойыздардың бір жолдан екінші жолға қауіпсіз өтуі қамтамасыз етілді. Ағаш шпалдар мен тозған рельстер, қиыршықтасы да толықтай алынып, жол түбегейлі қайта салынды. Айта кетейік, бір айға созылған құрылыс жұмыстарына өңірдің 100-ден астам теміржолшысы тартылды.
Жаңартылған бағытпен алғаш рет 57 вагоннан құралған 2057-ші пойыз жүріп өтті. Жаңадан іске қосылған «Серпантин» жолы пойыздарды тез әрі қауіпсіз сұрыптауды қамтамасыз етіп, Арыс торабындағы тасымалдау процесінің тиімділігін айтарлықтай арттырмақ.
