Көлік кептелісін азайтты
Түркістан облысы бойынша меншікті тілші
Үшінші мегаполис Шымкент қаласында көлік, коммуналдық және әлеуметтік инфрақұрылымды жаңғырту жұмыстары жүйелі түрде жүзеге асырылып келеді.
Мысалы, жуырда қаладағы маңызды нысандардың бірі – Момынов көшесіндегі теміржол өткелі техникалық тұрғыда ашылып, жүргізушілер үшін қолайлы жағдай жасалды. Сала мамандары бұл жоба көлік ағынын реттеуге және кептелісті азайтуға айтарлықтай ықпал ететінін айтады. Теміржолшылар арасында бұл жер «3 294 шақырымның 9-пикетіндегі күзетпелі бақылау бекеті» ретінде белгілі. Сондықтан да бұл ресми құжаттарда Момынов көшесіндегі өткел І санатқа жатады. Өйткені бұл нысан Шымкент қаласы мен халқы тығыз орналасқан Сайрам ауданын байланыстыратын негізгі бағыт саналады. Мұнда тәулігіне 12 мыңнан астам автокөлік пен түрлі санаттағы 60-қа жуық пойыз өтеді.
Қозғалыс қарқыны жоғары аумақты ескере отырып, жергілікті билік 2024 жылы бұл маңға көпір салу жөнінде шешім қабылдаған. Жобаны «Береке-А» құрылыс корпорациясы жүзеге асыруда. Құрылыс жұмыстары өткен жылдың екінші жартысында басталып, алдымен инженерлік-коммуникациялық желілерді реттеу жүргізілген. Нәтижесінде 2-3 ай ішінде негізгі жоспар толық орындалды.
Бұған дейін жүргізушілер әр 20 минут сайын теміржол өткелінде кептелісте тұруға мәжбүр болса, енді ұзындығы 132 метр болатын жаңа өткел арқылы үздіксіз қозғалыс қамтамасыз етілді. Көпір қаланың шығыс бөлігін орталық аудандармен байланыстырып, жолға кететін уақытты айтарлықтай қысқартады.
Мердігер компания өкілдері алдағы уақытта өткелге іргелес аумақта абаттандыру жұмыстары жүргізіліп, түнгі уақытта көрінуді арттыру үшін заманауи жарық шамдары орнатылатынын айтты. Ал құрылыс толық аяқталған соң нысанға 50 жылдық кепілдік беріледі. Жалпы жұмыстар 2026 жылдың мамыр айында толық тәмамдалады.