Қазақстанда жасалған...

«Жолаушылар тасымалы» АҚ «Қала маңы тасымалы» филиалының директоры Жамбыл Байділдиновпен компанияның жоспарлары мен жаңалықтары, хаб жүйесі қағидаты бойынша қала маңы тасымалын дамыту төңірегінде сұхбаттастық.

– Жамбыл Есенұлы, биылғы жазда пайдалануға берілген Burabay Express электропойызының атына жақсы да жағымды пікірлер көп естідік. Құрамның ерекшелігі неде?  

– Burabay Express № 888/887 электропойызы Петропавлда халықаралық стандарттар бойынша құрастырылды. Ол елорданың екі вокзалынан аттанып, екі жарым сағаттың ішінде жолаушыларды Бурабайға жеткізеді. Құрамында алты вагон және үш қызмет көрсету класы бар. Бірінші класта – реттелетін жоғары жайлылықтағы креслолар, жеке үстелдер, жаңа баспа және борттық тамақтану. Екіншісінде – «комфорт плюс» деңгейіндегі ыңғайлы орындықтар; сусындар мен ыстық тағамдарды сатып алуға болатын буфет жұмыс істейді. Үшіншісі – ыңғайлы орындықтар, USB/Type-C зарядтау және велосипедтерге арналған орын. Құрамда үш класты алты кондиционерленген вагон бар, барлығы 374 орын. 1-класс – 86 орын, 2-класс – 116 орын, 3-класс – 172 орын. Барлық вагондарда ауа баптағыштар мен ыңғайлы жылжымалы басқыштар орнатылған. Билеттер 45 тәулік бұрын ашылады, бұл жолаушыларға сапарды алдын ала жоспарлауға мүмкіндік береді. Демалушылар үшін тағы бір маңызды жайт: RixosBorovoe қонақтары үшін вокзалдан қонақ үйге дейін тегін трансфер ұйымдастырылған.  

– Астана – Бурабай бағытындағы бұрынғы құрамдарға қарағанда қандай техникалық ерекшеліктері бар?  

– Burabay Express-тің басты ерекшелігі – ол жолаушылардың түрлі артықшылықтарын ескереді. Бір құрамда бірінші, екінші және үшінші кластар бар, бұл әркімге жайлылық деңгейін таңдауға мүмкіндік береді. Пойыз Қазақстанда, Петропавлда жасалған, бұл да ерекше мақтаныш. Мұндай құрамдар Астана – Қарағанды, Астана – Көкшетау және Астана – Ерейментау бағыттарында жүруде. Бұдан басқа, электр пойызы заманауи қауіпсіздік жүйелерімен жабдықталған. Машинист өзінің пультінде барлық құрамның және әрбір вагонның техникалық жай-күйін жеке толық бақылайды.  

– Қозғалыс жиілігі қандай және маусымға байланысты кесте өзгере ме?  

– Бүгінде Burabay Express аптасына бес рет қатынайды – бұл біз өзгертуді жоспарлап отырған кесте емес. Ол бастапқыда Бурабайдың негізгі қонақ үйлеріне келу және шығу уақытымен сәйкес келетіндей етіп жасалған. Яғни кесте демалыспен біріктірілген: пойыз дәл туристерге келуге немесе нөмірді босатуға ыңғайлы болған кезде келіп, жөнелтіледі. Мұндай кесте қонақ үйлер мен біздің негізгі серіктестеріміздің ұсыныстарын ескере отырып қалыптастырылды.  

– Қауіпсіздік пен жайлылық қалай қамтамасыз етіледі? Жаңа пойызда жұмыс істеу үшін персоналды оқыту жүргізіле ме?  

– Әрине, қауіпсіздік қашан да бірінші орында тұрады. Burabay Express машинистке де, ахуалдық орталықта да қолжетімді заманауи бейнебақылау жүйесі орнатылған. Қажет болған жағдайда жолаушылар машинисті шақырудың арнайы түймешегін пайдалана алады, ол әрбір вагонда орнатылған. Машинист те өз пультінде барлық вагондардың техникалық жағдайын толық бақылай алады дедік, яғни штаттан тыс жағдайда тез әрекет етуге мүмкіндік бар. Сонымен қатар бейнежетондар жүйесі қосымша енгізілуде: өткізгіштер онлайн-режимде олардың әрекеттерін тіркейтін құрылғылармен жабдықталады. Бұл бақылауды күшейтеді және сервис сапасын арттыру үшін пойыздағы жағдайды талдауға мүмкіндік береді. Барлық жолсеріктер міндетті сертификаттау курсынан өтеді және штаттан тыс жағдайлардағы іс-қимылдарға үйретуді қоса алғанда, қозғалыс қауіпсіздігі бойынша рұқсаты болуы шарт. Ал қозғалысы шектеулі жолаушыларды ыңғайлы отырғызу және түсіру үшін арнайы көтергіштер қарастырылған. Сонымен қатар кеңейтілген санитарлық аймақ жабдықталған және ыңғайлы отырғызу үшін жылжымалы басқыштар орнатылған.  

– Сервисті цифрландыру бойынша жоспарлар қандай?  

– Пойызда қауіпсіздік ережелері мен сервистер туралы бейнероликтерді тарататын заманауи ақпараттық экрандар орнатылған. Басты жаңалық – Starlink технологиясы бойынша жоғары жылдамдықты интернетке қол жеткізу, ол барлық бағытта тұрақты Wi-Fi-мен қамтамасыз етеді. Жақын арада тамақтану сервисін қоса алғанда, жолдағы қызметтерді қолма-қол ақшасыз төлеу енгізілетін болады. Біз әрине мұнымен шектеліп қалмаймыз, алдағы уақытта қала маңындағы тасымалдарды дамыту хаб жүйесі қағидаты бойынша құрылатын болады. Мұндай формат пойыздарды басқа да көлік түрлерімен – алыс жолға, автобустармен және авиациямен біріктіруге мүмкіндік береді.  

– «Қала маңы тасымалы» филиалының жетекшісі ретінде жауапкершілікті қалай сезінесіз?  

– Мен мамандықты саналы түрде таңдадым. Техникумды бітіргеннен кейін 18 жастан бастап жұмыс істеуге мүмкіндігім болды. Бүгінде «Қала маңы тасымалы» филиалын басқарамын. Электр пойыздарымен жүруді барынша ыңғайлы, жайлы және біздің жолаушыларымыз үшін қолжетімді ету жолында мүмкіндіктің бәрін жасау – ең алдымен басшы ретінде менің жауапкершілігім деп білемін.