Қазақстанда теміржол өнімдерін өндіру жеті есе өсті

Қазақстанда теміржол машина жасау саласының өндіріс көлемі соңғы сегіз жылда жеті еседен астам өсіп, 104,5 млрд теңгеден 740 млрд теңгеден асты. Қазір салада 60-тан астам отандық кәсіпорын жұмыс істеп, 8,5 мыңнан астам адам еңбек етеді, деп хабарлайды Rail-news.kz.

Қазақстан машина жасаушылар одағы басқарма төрағасының орынбасары Ерқанат Мақановтың мәліметінше, елімізде локомотивтер, жүк және жолаушылар вагондары, теміржол дөңгелектері, осьтер, мойынтіректер, рельстер мен басқа да бөлшектер шығарылады. Өнім түріне қарай отандық қамту деңгейі 30-90%-ды құрайды.

2026 жылдың бірінші жартыжылдығында 345 млрд теңгенің теміржол өнімі өндірілді. Бұл өткен жылдың сәйкес кезеңінен 16,6%-ға көп. Электровоз өндірісі 24%-ға, жолаушылар вагондарын шығару 11%-ға артты.

Саланың дамуына ҚТЖ тапсырыстары да ықпал етуде. 2023-2025 жылдары отандық кәсіпорындар мен ҚТЖ компаниялар тобы арасында жалпы сомасы 158,8 млрд теңгеге 21 офтейк-келісімшарт жасалды.

Қазақстандық теміржол техникасы шетелге де экспортталуда. «Локомотив құрастыру зауыты» 17 жылда сегіз елге 42 локомотив жеткізді. Ал 2026 жылы Атырау вагон жасау зауыты Моңғолияға 100 жартылай ашық вагон жеткізуге келісімшарт жасасты.

Ендігі міндет – өндірісті тереңірек жергіліктендіріп, экспорттық нарықты кеңейту.