Үздік жобалар анықталды
Корреспондент газеты «Қазақстан теміржолшысы»
«Қазақстан темір жолы» ҰК» АҚ-да Астана ІТ университетінің студенттері бір ай бойы өндірістік тәжірибеден өтті.
Олар тәжірибелік сабақ барысында әзірлеген жобаларының нәтижелерін комиссияға ұсынды. Комиссия құрамына «ҚТЖ» ҰК» АҚ басқарма төрағасының стратегия және цифрландыру жөніндегі орынбасары Әнуар Ахметжанов, Астана IT университетінің ғылым және инновациялар жөніндегі проректоры Андрей Белощицкий және IT-компаниялардың өкілдері кірді. Іріктеу нәтижесінде 3 жоба үздік деп танылды.
Біріншісі – жүк пен багажды теміржол көлігімен тасымалдауды, сондай-ақ оларды қадағалауды басқару жүйесі. Екіншісі – сату арналары бойынша сатылған электрондық билеттердің саны туралы талдау деректері. Үшіншісі – өзара әрекеттесетін бөлімшелер мен бөлімдерді визуализациялау бойынша корпоративтік сайт. Astana Hub IT-стартаптар халықаралық технопарк алаңында жеңімпаз жобалардың авторлары Құрмет грамоталарымен марапатталды.