«Солтүстік–Оңтүстік» дәлізі маршрутында бірыңғай логистикалық оператор құрылады
Корреспондент газеты «Қазақстан теміржолшысы»
«TransRussia 2023» көлік-логистикалық қызметтердің 27-ші халықаралық көрмесі аясында «KTZ Express» АҚ, «РЖД Логистика» АҚ және «Түрікменстанның көлік-логистикалық орталығы» ААҚ арасында тасымалдауды дамыту үшін бірлескен кәсіпорын (БК) құру туралы меморандумға қол қойды, деп хабарлайды Rail-news.kz.
БК мақсаты «Солтүстік-Оңтүстік» халықаралық көлік дәлізінің шығыс бағытында бірыңғай логистикалық оператор құру.
Меморандумға «KTZ Express» АҚ Бас директоры Қайрат Утяпов, «РЖД Логистика» АҚ Бас директоры Дмитрий Мурев және «Түрікменстанның көлік-логистикалық орталығы» ААҚ бас директоры Мердан Бяшимов қол қойды.
Тараптар бәсекеге қабілетті тарифтік мөлшерлеме қалыптастыру және Ақсарай, Озинки, Болашақ, Инче-Бурун, Серахс шекаралық өткелдерінің қатысуымен Қазақстаннан, Ресейден, Түрікменстаннан Иранға, Үндістанға, Таяу Шығыс елдеріне және Азия-Тынық мұхиты өңіріне жүктерді «үзіліссіз» тасымалдау үшін өз құзыреттерін біріктіруге келісті.
Қазақстан үшін «Солтүстік-Оңтүстік» дәлізі Иран, Үндістанмен көлік-экономикалық байланыстарды дамытудағы басты өсім нүктелерінің бірі болып табылады. Қазақстандық жүк жөнелтушілер атап өткендей, осы құрлық дәлізінің Қазақстан аумағы арқылы айқын артықшылығы: жүктерді жеткізудің жоғары жылдамдығы және тасымалдауда барлық ауа-райының қолайлылығы болып табылады.