Жолаушыларды тасымалдау ережелерін бұзғандарға 6,2 млн теңге айыппұл салынды
Корреспондент газеты «Қазақстан теміржолшысы»
ҚР ИИДМ Көлік комитеті жыл басынан бергі бес ай ішінде жылжымалы құрам мен теміржол инфрақұрылымына жүргізілген тексеру жұмысын қорытындылады. Осы кезеңде көліктік бақылау органдары темір жолдың 6730 шақырымнан астамын, жылжымалы құрамнан 3874 пойызды, теміржол қызметіне қатысы бар 149 кәсіпорынның жай-күйін тексерді. Жыл басы 1 қаңтардан 1 маусымға дейін теміржолда қозғалыс қауіпсіздігін бұзудың 509 жағдайы тіркелген. Аудиторлар қозғалыс қауіпсіздігінің бұзылуының негізгі себептеріне – жолдар мен жылжымалы құрамның техникалық жағдайын дұрыс сақтамауын атап отыр. Инспекция қорытындысы бойынша 314 темір жол және бағыттамалы бұрмалар, 246 жылжымалы құрамды пайдалану тоқтатылды. Тексеру барысында теміржол көлігінің қызметін реттейтін нормативтік-құқықтық актілер талаптарының 2359 рет бұзылғаны белгілі болды. Салынған айыппұлдардың сомасы 28 миллион теңгеге жуықтады. Арнайы шара барысында 385 жолаушылар пойызы тексеріліп, жолаушыларды тасымалдау ережелерін бұзудың 818 жағдайы анықталды. Атап айтқанда, техникалық бөлім бойынша – 513, өртке қарсы қауіпсіздік бойынша – 18 кемшілік анықталды. Тәртіп бұзушыларға 6,2 млн теңге айыппұл салынды. Пәкістанның Пенджаб провинциясында 73 жолаушының өмірін қиған қайғылы оқиғадан кейін, жолаушылар пойыздарында өрт қауіпсіздігінің сақталуын және вагондардың техникалық жай-күйін бақылауды көліктік бақылау органдары ҚР ІІМ Төтенше жағдайлар комитетінің құрылымдық бөлімшелері және «Қазақстан темір жолы» ҰК» АҚ-мен бірлесіп, мұқият жүргізуде. Сонымен қатар, Мемлекет басшысының тапсырмасы бойынша ҚР ИИДМ Көлік комитеті жолаушылар пойыздарына билеттердің қолдан жасалған тапшылығын жою бойынша жоспарлы жұмыс жүргізуде. Осы жылы 17 маусым мен 16 шілде аралығында Қазақстан теміржол вокзалдарының аумағында билет алып-сатарлар ісін жою бойынша операция жүргізілуде.