Қауіпсіздік – ортақ міндет

Арыс қаласында теміржол және автомобиль жолдарында ауыл шаруашылығы жануарларының жолға шығуынан туындайтын жол-көлік оқиғаларының алдын алу мәселесін талқылаған жиын өтті.

Қала әкімінің орынбасары Ерғали Қуандықтың төрағалығымен өткен мәжіліс жол қауіпсіздігін қамтамасыз етуге бағытталды. Жиынға тараптағы теміржол мекемелері басшыларынан бөлек, Арыс-1 станциясындағы желілік полиция мен аудандық полиция бөлімдері, қалалық ауыл шаруашылығы, тұрғын үй-коммуналдық шаруашылық, жолаушылар көлігі және автомобиль жолдары бөлімі, ауылдық округ әкімдері мен ветеринарлық бекет меңгерушілері қатысты.  

Басқосу барысында Арыс-1 станциясындағы желілік полиция бөлімі бастығының орынбасары Н.Орынбаев ағымдағы жылы теміржол бойында тіркелген оқиғалар туралы баяндама жасады. Оның айтуынша, жыл басынан бері темір жолда 55 рет шұғыл тежеу қолданылған. Соның ішінде жолға адамның шығуы - 5 рет, жылқы - 10 рет, ірі қара - 20 рет, ұсақ мал - 20 рет тіркелген. Осыған байланысты темір жолға жақын орналасқан елді мекен тұрғындары арасында ауыл әкімдіктері мен ветеринария мамандарының қатысуымен түсіндіру жұмыстарын күшейту ұсынылды.  

Автомобиль жолдарында да ауыл шаруашылығы жануарларының жолға шығу мәселесі сөз болды. Қараусыз малдың жол қозғалысына қатысушылардың өміріне қауіп төндіріп қана қоймай, мал иелеріне де елеулі материалдық шығын әкелетіні айтылды.  

Айта кетейік, елімізде Ауыл шаруашылығы министрінің 2020 жылғы 29 сәуірдегі №145 бұйрығымен бекітілген «Ауыл шаруашылығы жануарларын жаю қағидаларына» сәйкес, жалпыға ортақ пайдаланылатын жерлерде, темір жол және автомобиль жолдарының бөлінген белдеулерінде, сондай-ақ су және санитарлық қорғау аймақтарында мал жаюға тыйым салынады. Қадағалаусыз жүрген жануарлар қараусыз мал ретінде есептеледі.  

Жиын қорытындысында тұрғындарға өз иелігіндегі үй жануарларын қараусыз қалдырмау, әсіресе түнгі мезгілде қауіпсіздікті арттыру мақсатында малға жарық шағылыстырғыш таспалар тағу жөнінде үндеу жасалды. «Әкімшілік құқық бұзушылық туралы» кодекстің 559-бабына сәйкес, теміржол көлігінде қозғалыс қауіпсіздігін қамтамасыз ету қағидаларын бұзған тұлғалар жауапкершілікке тартылатыны ескертілді.