Алғашқы көмек маңызды
Түркістан облысы бойынша меншікті тілші
Жуырда Шымкентте азаматтық қорғаныс саласына арналған семинар-сабақ өтті. Шараның мақсаты – теміржол ұжымдары арасында азаматтық қорғанысқа деген жауапкершілік пен түсінікті күшейту.
Семинарды «ҚТЖ-Жүк тасымалы» ЖШС Шымкент филиалының Азаматтық қорғаныс жұмыстарын ұйымдастыру және жүргізу бөлімі мен Магистральдық желі бөлімшесінің азаматтық қорғаныс және төтенше жағдайлар бөлімі ұйымдастырды.
Басқосуға станциялар мен өндірістік бөлімшелердің қызметкерлері, бас инженерлер, азаматтық қорғанысқа жауапты мамандар қатысып, жалпы саны 50-ге жуық адам қамтылды. Теориялық бөлімде Шымкент қалалық Төтенше жағдайлар жөніндегі департаментінің жедел құтқару жасағы мен медицина мамандары азаматтық қорғаныс ұғымы, төтенше жағдайлар кезіндегі әрекеттер, алғашқы медициналық көмектің негізгі тәсілдері жөнінде дәріс оқыды. Ал практикалық бөлімде жүрек-өкпе реанимациясын жасау, қан кетуді тоқтату мен жарақат алған адамға алғашқы көмек көрсету жолдары көрсетілді.
Мамандардың айтуынша, алғашқы медициналық көмекті дер кезінде және дұрыс көрсету адам өмірін сақтап қалуда шешуші рөл атқарады.
– Сондықтан да мұндай оқу-жаттығу сабақтарын ірі өндірістік бөлімшелерде тұрақты өткізу арқылы сала мамандарының біліктілігін шыңдай түсеміз деген сенімдеміз, – дейді бөлімшенің жетекші инженері Әлия Ахметова.
Осылайша, семинар аясында қатысушылар азаматтық қорғаныс пен алғашқы көмек көрсету дағдыларын меңгеру – әр қызметкердің ғана емес, әрбір азаматтың міндеті екеніне назар аударды.