Арыс өрт сөндіру пойызы 5 гектар аумақты шарпыған өртті сөндірді
Түркістан облысы бойынша меншікті тілші
Арыс станциясында орналасқан ПП-28 өрт сөндіру пойызының кезекші бөліміне 2026 жылғы 13 қаңтарда таңғы сағат 03:38-де Арыс – Монтайтас тас жолы бойында орналасқан «ҚаратауТрансСервис» компаниясының мұнай базасында өрт шыққаны туралы хабар түсті. Өрт мұнай өнімдері сақталған резервуарлар аумағында орын алған.
Апатты жағдайға байланысты облыстық Төтенше жағдайлар департаментінің жедел кезекшісі Шымкент станциясындағы орталық пунктке хабарласып, өртті сөндіруге қосымша күш сұраған. Сол себепті Арыс станциясынан ПП-28 өрт сөндіру пойызының ұжымына дабыл қағылып, шұғыл түрде оқиға орнына аттанды.
Өрт сөндіру пойызының мамандары оқиға орнына сағат 04:47-де жедел жетіп, қас-қағым сәтте көбік беруді бастап кетті. Мұнай базасының қызметкерлері насос жүйесіне мұнай өнімдерінің берілуін тоқтатып, вентильдерді жауып, өрттің одан әрі таралуының алдын алды.
– Жедел әрі үйлесімді әрекет ету нәтижесінде біз өртті 04:59-да оқшаулап, 06:38-де тілсіз жауды толықтай сөндірдік. Өрт аумағы шамамен 5 гектар жерді қамтыды. Жақын маңда орналасқан 5 ірі және 4 шағын резервуарға қауіп төнгенімен, олардың барлығы аман сақталды, – дейді Арыс өрт сөндіру пойызының бастығы Әлімжан Есқараұлы.
Оқиға орнында 60-қа жуық өрт сөндірушілер жұмыс істеп, 10-нан астам түрлі техника жұмылдырылған. Оның ішінде Төтенше жағдайлар жөніндегі бөлімшенің 33 маманы мен 5 бірлік техникасы, Арыс өрт сөндіру пойызының 12 қызметкері, 44 859 әскери бөлімінің 8 қызметшісі мен 2 бірлік техникасы қатысқан. Ал өртті сөндіру үшін 58 тонна 632 литр су мен 1152 литр көбік пайдаланылған.
Қазіргі уақытта өрттің шығу себебі мен зақымдану деңгейі, келтірілген материалдық шығын көлемі мен сақталған мүліктің бүліну деңгейі Төтенше жағдайлар департаментінің арнайы комиссиясы тарапынан тексерілуде.
