Ақтөбе жүк тасымалы бөлімшесі жоспарды артығымен орындады
Ақтөбе жүк тасымалы бөлімшесі 2019 жылдың алғашқы жұмыс тоқсанын қорытындылады. Жүк тасымалдау көлемінің жоспары артығымен орындалған. Жүк айналымы техникалық жоспарға - 101% өскен. Бұл дегеніміз 4 млрд 644,8 млн тоннаны құрайды. Нәтижесінде кіріс көлемі 10 млрд теңгеге жуықтап отыр.
«Жүк тиеу көлемі жоспарға қарағанда 0,6%-ға жақсарды. Бұл 3 млн 919 мың тоннаны құрап отыр. Жоспар бойынша қара металл 14,5 мың тоннаға, қара металл сынықтары 5,8 мың тоннаға, астық көлемі 4,1 мың тоннаға орындалған. Тасымалдардың негізгі қызметінен түскен кіріс көлемі 9 млрд 406 млн 772 мың 226 теңгені құрады. Жүк тасымалының көлемімен қатар, сапалы қызмет көрсету жағдайы да жақсарды. Оның ішінде, локомотивтің орташа тәуліктік өнімділігі жоспарға қарағанда 1,9% жоғарылаған», – деп ақпар берді Ақтөбе жүк тасымалы бөлімшесінің техникалық бөлім бастығы Жасұлан Рсқалиев.
Бұл 2018 жылдың сәйкес кезеңіне қарағанда 3,1%-ға артық өсімді көрсетеді. Сонымен қатар, вагон паркін пайдалану көрсеткіштері керісінше, аздап кері көрсеткішке ие. Локомотив паркінің тәуліктік жүрісі 99,8% құрап, пойыздық техникалық және учаскелік жылдамдығы тиісінше 0,9 және 0,3% төмендеген. Сонымен қатар, пойыздар қозғалысының артуына байланысты дизель отынының шығыны да артып отырған көрінеді.
«Ағымдағы жылдың 1-ші тоқсан қорытындысы бойынша жұмыс көлемі 47,8 млн. ткм-ге ұлғайғанына байланысты дизель отынының шығыныны 3,07% өсуіне жол берілген», – дейді бұл туралы Жасұлан Рсқалиев.
Ардақ ЕРУБАЕВА