Отбасы – шағын мемлекет

Ақтөбе облысы әкімі жанындағы Әйелдер істері және отбасылық-демографиялық саясат жөніндегі облыстық комиссияның мүшелері теміржолшылармен кездесті.

Кездесуде отбасы жауапкершілігі туралы ашық әңгіме айтылды. Тұрмыстық зорлық-зомбылықтың алдын алуға қатысты заңнамадағы өзгерістер де талқыланды. Отбасының әрбір мүшесінің қауіпсіздігі мен қадір-қасиетіне қамқорлық жасау туралы ой-пікірлер өрбіді.  

«Отбасы – шағын мемлекет. Кез келген түрдегі зорлық-зомбылықты болдырмауымыз керек. Зардап шеккендерді қолдауға және ерте әрекет ету жүйесінің кез келген түрін қолдануымыз керек», – деді «Қазақстан әкелері» қауымдастығының төрағасы Аманғос Құлов.  

Әрі қарай әрбір әкенің жеке жауапкершілігін түсінуге бағытталған шағын мотивациялық тренинг өткізілді. Қазіргі қоғамдағы әкенің беделін арттыру үшін қарапайым қатынастарды сақтау маңыздылығы айтылды. Отбасылық тәрбиенің практикалық аспектілеріне қатысты көпшіліктің сұрақтарына жауап берілді. Комиссия құрамындағы аналар өскелең ұрпақты қазақ дәстүрлері мен ұлттық адамгершілік рухында тәрбиелеудің маңыздылығын атап өтті.  

«Мұндай кездесулер пікіралмасуға ғана емес, қоғам мен мемлекеттік құрылымдар арасында жанды диалог құруға көмектеседі. Елдің әр бұрышында тұрақты, қауіпсіз және бақытты отбасыларды қалыптастыру мақсатын көздейді», – деді Ақтөбе магистральдық желі бөлімшесінің кадр қызметкері Гүлден Сарқұлова.