Медициналық пойыз – Маңғыстауда
Маңғыстау облысы бойынша меншікті тілші
«Саламатты Қазақстан» медициналық пойызы маңғыстаулық тұрғындарды қабылдауда. Түбектің тоғыз теміржол станциясына аялдайды деп жоспарлаған пойыз кеше Қарақия станциясына жетіп, жұмысын жалғастырды. Пойыз демалыс күні Болашақ станциясында болып, шалғайдағы елдімекенде тұратын халыққа қызмет көрсетті.
25 мамыр күні Болашақ станциясындағы тұрғындар медпойыздағы мамандардың қызметін алуға таңсәріден келе бастады. Соның бірі Болашақ өрт сөндіру пойызында еңбек ететін, әрі сол ауылдың қоғамдық қауымдастығының төрағасы Ерболат Бытықов жанұясымен бірге сол жерден табылды. Тісі ауырып, оны қаратуға бәлен шақырымдағы қалаға баруға уақыт таппай жүрген ол үйінің алдына келіп тұрған тегін стоматологқа жүгініп, біраздан бері жанына батып жүрген дертінен құтылғанын айтады. Сонымен қатар ЭКГ, УДЗ талдауларын жасатып, кардиологтан кеңес алып, денсаулығының жай-күйіне қатысты біраз мағлұмат біліп, заңгерден көкейдегі сұрақтарына жауап тапқан ағамыз «Саламатты Қазақстанды» ұйымдастырушыларға алғысын жаудырды.
– Пойыз станцияға таңғы жетіде келіп, тоғызда жұмысын бастап кетті. Кешкі сағат 18.00 дейін болашақтықтарды қабылдады. Биыл ауыл жұрты былтырғыға қарағанда белсенді, көп адам келді. Пойыздағы медбригада үйінде ауырып жатқандарға да барып тиісті кеңесін беріп, көмегін көрсетті. Ауылымыздан барлығы 376 адам медициналық байқаудан өтті, соның ішінде 142-сі бала. 169 адам үйден мобильді топтың қызметін алды. Станциямыз орталықтан алыста болғандықтан бұл пойыз – біздің тұрғындар үшін өте қуанышты жаңалық. Жылда халық медициналық пойызды күтіп жүреді. Себебі көбі жұмыста, қалаға кетіп, анау дәрігерден шығып, мына дәрігерді жағалап жүруге уақыты бола бермейді. Сондықтан айтарымыз тек қана алғыс, – дейді Болашақ станциясы бастығы Мақсат Нұрбеков.
Пойыз бастығы Абай Досбергеннің айтуынша пойызда жалпы сегіз вагон болса, соның жартысы – медициналық құрал-жабдық, құрылғылар. Онымен 29 түрлі мамандықтағы дәрігер, бір заңгер мен бір медиатор келген. Болашақ – пойыз тоқтаған үшінші аялдама. Болашақтан соң Қарақия, Шетпе, Ақжігіт, Бейнеу, Қорқол, Боранқұл станцияларында болады. 3 маусым түбек тұрғындарына қызметін аяқтап, әрі қарай Атырауға жол тартады. Сонымен «Саламатты Қазақстан» түбектің тоғыз станциясына барып, тұрғындарға медициналық және заңгерлік қызметтер көрсетеді.
