Ақжолтай пойызға алғыс айтты
Ақтөбе облысы бойынша меншікті тілші
«ҚТЖ» ҰК» АҚ , «Samruk-Kazyna Trust» қоры және Денсаулық сақтау министрлігі арасындағы әріптестік шеңберінде іске асқан әлеуметтік жоба арқасында бүгінде шалғайдағы ел тұрғындары сапалы медициналық қызметке қол жеткізуде.
«Саламатты Қазақстан» медициналық пойызы Ақтөбе облысындағы сапарын аяқтады. Жылжымалы құрам облыстың шалғай ауылдары Шұбарқұдық, Қарашоқат, Қотыртас, Қандыағаш, Мәртөк, Ақкемер және Кемпірсай елді мекендерінде болды. Жобасының негізгі мақсаты да осы – шалғайдағы ауыл тұрғындарына сапалы әрі қолжетімді медициналық көмек көрсету. Ауылдан шықпай-ақ, мыңдаған адам өздері келген дәрігерлерге тексеріліп, қажетті ем алды. Дәрігерлер алғашқы қарап-тексеру, түрлі диагностикалық аппараттарға түсіріп, талдау, ем тағайындау қызметтерін ұсынады. Қажет болған жағдайда кішігірім хирургиялық операция жасайтын да мүмкіндіктері бар. Медициналық бригада құрамына 36 білікті дәрігер, медиатор және заңгер бар.
Осы аптада медициналық пойыз облыстың Мәртөк ауданында сапарын аяқтады. Аудан әкімдігінің хабарлауынша, халықтың алғысы шексіз. Ем-домнан бөлек халық отбасылық-демографиялық саясат жөніндегі ұлттық комиссияның заңгерлері мен медиаторлардан кеңес алған. Олар әлеуметтік төлемдер, еңбек даулары, жер мәселелері мен басқа да құқықтық сұрақтар бойынша тегін көмек көрсеткен.
Мәртөктен кейін пойыз Ақкемер мен Кемпірсай ауылдарына аялдап, шілде айының соңғы күні жұмысын аяқтады.