Медициналық пойыз 48 станцияны қамтыды
«Қазақстан теміржолшысы» газетінің тілшісі
«Саламатты Қазақстан» медициналық пойызы сапарын одан әрі жалғастыруда. Бүгінге дейін пойыз 6 облыстың – Маңғыстау, Атырау, Ақтөбе, Батыс Қазақстан, Солтүстік Қазақстан және Ақмола облыстарының 48 станциясына аялдады.
Жоба аясында 10 мың баланы қоса алғанда барлығы 32 мың адам пойыздағы медицина мамандарына қаралды, оларға 91 мыңнан астам медициналық қызмет көрсетілді. Соның ішінде стоматологиялық қызметтер, зертханалық зерттеулер, кішігірім хирургиялық оталар, ультрадыбыстық және рентгенологиялық зерттеулер бар. Аурулардың ерте диагностикасы мен дер кезінде емделуіне ерекше назар аударылуда. Қазіргі сәтте жүрек-қан тамырлары аурулары, қант диабеті және балалардың ауруларын қосқанда түрлі дертке шалдыққан 1933 науқас анықталды. 255 баланы қоса алғанда барлық науқастар тұрғылықты жері бойынша емханалардың тұрақты бақылауына алынды.
Жоба тек диагностикалау үшін ғана емес, сонымен бірге күрделі және төтенше жағдайда шұғыл медициналық көмек көрсетуде де маңызды. Мәселен Жақсы станциясында кардиологқа қаралған науқастың ауруын дер кезінде анықтау арқылы ол бір ажалдан аман қалды. Одан миокарда инфаркті анықталып, дереу ауруханаға жатқызылды.
Медициналық пойыздың жұмысы әлі де жалғасуда, жылдың соңына дейін Қазақстанның 11 облысындағы тағы 44 станцияны қамту көзделген. Пойыз құрамында педиатр, кардиолог, рентгенолог, хирург және басқаларын қоса алғанда 14 тар бейінді салалық маман бар.