Армандар орындалады

Кейде үлкендердің өзі армандауға қорқады. Ал балалар ше? Олар арманына шын сенеді. Сол сенімнің арқасында өмірде керемет сәттер орын алып жатады. Алты жасар Әнуар Әбсаттаровтың оқиғасы – соның айқын дәлелі.

Балаларды қорғау күні қарсаңында теміржолға ерекше қызығатын кішкентай Әнуардың көптен бергі арманы орындалды. Қазақстан темір жолы қызметкерлері оған арнайы экскурсия ұйымдастырып, нағыз теміржолшының өмірімен жақынырақ танысуға мүмкіндік берді.

Әнуар Қызылорда облысындағы Байқоңыр қаласында дүниеге келген. Оның теміржолға деген қызығушылығы төрт жасынан басталыпты. Басқа балалар ойыншық көлікке немесе мультфильм кейіпкерлеріне қызықса, Әнуар туған жеріндегі Төретам станциясына барып, пойыздардың қозғалысын тамашалауды ұнатады.

Ол үшін пойыздың дауысы ерекше әуен секілді.

Күн сайын станцияға барып, машинистермен әңгімелесетін. Локомотивтердің түрлерін, олардың серияларын, қалай жұмыс істейтінін сұрап, теміржол қозғалысының қыр-сырын білуге тырысады. Жасына қарамастан, техникаға деген қызығушылығы үлкендерді таңғалдырмай қоймайды.

Қазір Әнуар Астанада тұрады. Бірақ уақыт пен мекен оның сүйікті ісін өзгерте алмады. Ол әжесімен бірге вокзалға жиі барып, пойыздардың қозғалысын бақылауды әдетке айналдырған. Тіпті «Нұрлы жол» вокзалында ашылатын теміржол музейін асыға күтеді. Музей қызметкерлерімен сөйлескенде, көрмеге қойылатын көптеген заттардың атауын айтып, олардың қандай мақсатта қолданылатынын түсіндіріп бергенде мамандардың өзі таңданысын жасыра алмапты.

Әнуардың теміржолға деген махаббаты туралы әжесі ерекше ықыласпен айтып берді.

– Бастапқыда Төретам станциясына жиі баратынбыз. Ол пойыздарды көріп, рельстерді ұстап, локомотивтердің дауысын тыңдағанды жақсы көретін. «Әже, қарашы, рельс қандай тамаша!» деп қуанып тұратын. Содан бері қызығушылығы бір сәтке де басылған жоқ. Қазір машинист болуды армандайды. Вокзалға келген сайын тепловоздардың модельдерін ажыратып, олардың ерекшеліктерін айтып береді. Машинистермен сөйлесіп, болашақта өздерінің әріптесі болғысы келетінін жасырмайды, – дейді Алмагүл Әбсаттарова.

Теміржолшылар да кішкентай жанкүйердің ықыласына бейжай қарамаған. Олар Әнуарға локомотив кабинасын көрсетіп, басқару тетіктерінің қызметін түсіндірген. Қазір бала әр құрылғының атауын жатқа айтып, олардың не үшін қажет екенін егжей-тегжейлі баяндап береді.

Экскурсия барысында Әнуар вагондарды локомотивке тіркеу процесін, пойызды қозғалысқа дайындау жұмыстарын өз көзімен көрді. Бұл күн оның өміріндегі ең бақытты сәттердің біріне айналды.

– Бүгін мен үшін өте қуанышты күн болды. Локомотивке вагондарды тіркеу, оны жүргізу процесін көру қатты ұнады. Болашақта міндетті түрде машинист болғым келеді, – дейді Әнуар.

Баласының емес, немересінің арманына айналған осы қызығушылықты қолдап жүрген әжесі де ерекше алғысын білдірді.

– Әнуардың арманы осындай деңгейде орындалады деп ойламадым. ҚТЖ қызметкерлеріне мың алғыс. Балалардың арманын тыңдап, оған қанат бітіру – үлкен іс. Сондықтан әр бала армандай білсін. Армандар міндетті түрде орындалады, – дейді ол.

Шынында да, кейде үлкен жетістіктер кішкентай армандардан басталады. Бәлкім, бүгін локомотив кабинасында таңданыспен отырған алты жасар Әнуар ертең мыңдаған шақырым жолды бағындыратын тәжірибелі машинист болар. Өйткені шынайы қызығушылық пен бала жүрегіндегі сенім кез келген арманды шындыққа айналдыра алады. Кездесу соңында ҚТЖ қызметкерлері болашақ машинисті Балалар күнімен құттықтап, сыйлықтар табыстады.