Ақтөбелік ардагер теміржолшы 700 шақырым жолды велосипедпен жүріп өтті
Ақтөбелік ардагер теміржолшы Жұмабай Отарғалиев 700 шақырым жолды велосипедпен жүріп өтті. Пойыз жолын жағалап жүрген 65 жастағы қарт теміржолшы 10 күнде Ақтөбеден Қызылордаға жеткен. Ардагер бұл жетістігін Қазақстан темір жолының 115 жылдығына арнап отыр.
«7 сәуір – Халықаралық денсаулық күні сапарға шықтым. Сапарды алдын ала жоспарлап, веложүрістің маршрутын жасадым. Бірінші Шалқар қаласына дейін пойызбен жетіп алдым. Сол жердегі әскерилендірілген теміржол күзеті мекемесінде 2-3 сағат тынығып, таңғы сағат 9-да жолға шықтым. Биыл Қазақ темір жолына 115 жыл және Ақтөбе қаласына 150 жыл толады. Атаулы датаны өзім осылай атап өткім келді», – дейді зейнеткер.
Ардагер темір жол бойын жағалап жүріп отырған. Жол бойындағы барлық станциялар мен бекеттерге тоқтап, жергілікті теміржолшылармен тілдесіп, са лауатты өмірді насихаттаған. 65 жастағы қарияның өзі талай жылдан бері салауатты өмір салтын ұстанады. Таңғы уақытта жүгіріп, өзін жаттықтырып отырудан жалыққан емес. «Шайтан арба» мінген ақсақалдың бұл бірінші сапары емес, соңғы бірнеше жыл талай жерді шарлады. Спортпен тұрақты айналысқандықтан жолда қиындық көрмейтінін, қайта шыңдала түсетінін айтады.
«Шалқар қаласынан Қызылорда облысына дейінгі барлық разъездерді аралап шықтым. Тұрақты жаттығулардың арқасында жолда шаршап, қиындық көрген жоқпын. Велосипедтің жарылған дөңгелегін жолда өзім жөндеп алдым. Тоғыс станциясы, Құрлық разъезі, Сексеуіл станциясында кідіріп демалдым. Қайырымды жандар аман болсын. Жолымда кездескен теміржолшылар қарсы алып, жоғымды түгендеп беріп, ақ жол тілеп шығарып салып жатқан көңілдерінің өзі неге тұрады...»,– дейді ақсақал.
Қызылорда шекарасында ақсақалды әскерилендірілген күзет қызметінің жігіттері құшақ жая қарсы алып, сүт қатқан қою шаймен сыйлап, сапары барысында көрген-білген әңгімесін тыңдады. Ақсақал жастарға 115 жыл тарихы бар Қазақстан темір жолының кешегісі мен бүгіні туралы, өзі көрген, куә болған қызықты оқиғалар мен деректер жайлы айтып берді.