Ақтөбеде Жеңіс күні құрметіне жеңіл атлетикадан жарыс өтті
![](https://rail-news.kz/uploads/posts/2019/5/9/1557386525415.jpg)
Ақтөбе магистральдық желі бөлімшесі демалыс күні Жеңіс күні құрметіне жеңіл атлетикадан жарыс өткізді.
«ҚТЖ» ҰК» АҚ теміржолшыларының арасында спорттық жарыстар ұйымдастыру – дәстүрге айналған шара. Кешегі өткен шара да соның айғағы. Ақтөбедегі мұнайшылар стадионында өткен жарысқа теміржол мекемелерінен 10 команда қатысуға тілек білдірген.
«Алдымызда келе жатқан Ұлы Жеңіс күніне магистральдық желі бөлімшесінің спорт нұсқаушыларының ұйымдастыруымен жеңіл атлетикадан спорттық шара ұйымдастырылды. Мақсат – жұмысшылар арасында ауызбіршілікті нығайту мен салауатты өмір салтын ұстануға үндеу. ҚТЖ құрама командасының арасында мықты спортшылар аз емес. Шараның соңы «Никотинге дәрумен» акциясымен жалғасты. Акция елордадан басталып, эстафетаны жалғастыруда. Бізден кейін Шалқар және Ақтөбе әскери күзет мекемесі өткізді», – дейді спорт нұсқаушысы Нұргүл Батырхан.
Спорттық бәсекеде НЖС-11 командасының желаяқтары бас жүлдені еншіледі. Ал бас есептеу орталығы мен Жолаушы вагондарын жөндеу мекемесінің командалары одан кейінгі жүлделі орындарды бөлісті. Жекелеген жарыстарда 1000 метрге жүгіруден Никельтау станциясының маманы Айбек Жолдыбай жеңіске жетті. 500 метр қашықтықта бас есептеу орталығынан Нұрлыбек Сүйінов пен вагон сервис мекемесінен Ақпатша Сариева жеңіске жетті. Ал 300 метр қашықтыққа жүгіруден әйелдер арасынан ардагер теміржолшы Гүлшат Бижановаға жететін жан болмады.
Ардақ ЕРУБАЕВА