60 мың вагон қолданыста
«Қазақстан темір жолшысы» газетінің тілшісі
Теміржолдағы көмір тасымалы – әсіресе күз мезгілінде күрделене түсетін тақырып. Жыл сайын «ҚТЖ» ҰК» АҚ жүк жөнелтушілерді күзде емес, жазғы уақытта көмір тасымалы көлемін арттырып, жылыту маусымында басталатын қарбаластың алдын алуға шақырса да, іс жүзінде бұған қол жеткізу оңай болмай келеді.
«ҚТЖ-Жүк тасымалы» ЖШС атқарушы директоры Нұржан Келбұғановтың айтуынша, өткен жылдың қорытындысында Қазақстанда 106,2 млн тонна көмір тасымалданған, бұл 2020 жылғы көрсеткішке қарағанда 3 млн тоннаға көп. Ал биыл алғашқы жартыжылдықта теміржол арқылы 36,8 млн тонна тасымалданыпты. Осы бағытта биыл жедел штаб құрылып, күн сайын тиісті құрылымдардың қатысуымен отырыстар өткізілуде. Сол отырыстарда көмір тасымалындағы дүрбелең – тасымал процесі кезінде емес, көмірді теңдей тиеу және түсіру процесінің болмауынан туындайтыны айтылады, алайда бұған «ҚТЖ» толықтай ықпал ете алмайды. Теміржолшылар кірме жолдардың иелеріне инфрақұрылымды көмір тасымалына уақытылы дайындауды сұрайды. Сонымен қатар ірі көмір кен орындарымен бірге жүк ағынын бағдарлау бойынша жұмыстар жүргізілуде. Бұл жерде, яғни қоймаларда көмір жетіспеушілігін тудырмас үшін көмірді алдын ала сатып алу және сақтау мәселесі бойынша әкімдіктер тарапынан қолдау керек.
«Қазтеміртранс» АҚ бас директорының орынбасары Александр Ширяевтің айтуынша, компания паркінде қазіргі таңда 22 мың ашық вагон бар, ал жеке операторлардың жылжымалы құрамын қосқанда желіде 60 мың вагон қолданыста. Бұл көмір тасымалы бойынша жылжымалы құрамды теңдей пайдаланған жағдайда жеткілікті. Бұған қоса «ҚТЖ» тарифтері 1 тамыздан бастап арттырылғанның өзінде нарықтағы бағадан төмен күйінде қалып отыр. Сондықтан «Қазтеміртранс» АҚ паркіне сұраныс жоғары болып тұр.