Контейнерлік транзитте өсім бар
Ақтөбе облысы бойынша меншікті тілші
«ҚТЖ-Жүк тасымалы» Батыс филиалында контейнерлік пойыздар жүрісі жіті қадағаланады. Соңғы жеті айда Ақтөбе теміржолы арқылы 1514 контейнерлік пойыз өткен. Ал Оралдан 456 контейнерлік пойыз жөнелтілген.
Жалпы, Батыс аймақта контейнерлік пойыздар транзиті бойынша өткен 7 айдың ішінде қол жеткен жетістіктер жоқ емес. Тоғыз жолдың торабында тұрған Ақтөбе жүк тасымалы бөлімшесі көршілес елдер арасындағы жүк дәлізі мүмкіндіктерін тиімді пайдаланып отыр. Ақтөбе бөлімшесінде контейнерлік пойыздардың маршрут жылдамдығы тәулігіне 1048 шақырымды құрады. Бұл – өткен жылмен салыстырғанда 11% жақсарды деген сөз.
«Ауыр салмақты пойыздарды құрастырып жолға шығару, жылжымалы құрамды кідіріссіз жөнелту бойынша қолға алынған тәсілдер оң нәтиже берді», – дейді техникалық бөлімнің жетекші инженері Әлия Абдулина.
Батыс аймақтық жүк тасымалына қарасты техникалық бөлім мамандарының айтуынша, ұзын контейнерлік пойыздар маршрут жылдамдығына кедергі келтіреді. Батыс аумағынан өткен мұндай пойыздар саны 766- ға жетеді. Оның 208-і қос пойыз. 2021 жылы өңірден 869 ұзынқұрамды пойыздар өтсе, 2022 жылдың жеті айдағы көрсеткіші бойынша 766 пойызды құрап отыр.
«Қытай-Еуропа-Қытай» бағытындағы контейнерлік пойыздардың бағдарлық жылдамдығын арттыру жұмыстары оң нәтиже беруде. Контейнерлік пойыздардың жол үстінде аялдауы, локомотив бригадаларының алмасуы, локомотивтерді ауыстыру және техникалық бақылау жүргізу уақыттары қысқартылған. Және олардың аймақтан көп кідірмей өтуіне қатысты барлық шаралар қарастырылған.
Сонымен қатар, контейнерлік пойыздардың жылдамдығын арттыруға негізделген жұмыстарға да басымдық берілуде.