Қостанай станциясында жүк тиеу көлемі 40%-ға өсті
Қостанай станциясында жүк тиеу көлемі өткен жылмен салыстырғанда 40% өсті, деп хабарлайды Rail-news.kz.
«ҚТЖ-Жүк тасымалы» ЖШС бас директорының орынбасары Нұржан Келбұғанов Қостанай станциясында тасымалдауды ұйымдастыру мәселелері бойынша Астық өңдеушілер одағы, ҚР ұн тартушылар қауымдастығы және жүк жөнелтушілер өкілдерінің қатысуымен кеңес өткізді. Бұл соңғы аптадағы тасымалдау процесіне қатысушылармен екінші кездесу. Бірінші кездесу қорытындысы бойынша жедел мәселелердің бірлескен шешімдері қалыптастырылды.
Нұржан Келбұғанов Қостанай станциясындағы тасымалдау жағдайы ерекше бақылауда екенін атап өтті. Станция штаттық режимде жұмыс істейді. Тиеу көлемі өткен жылмен салыстырғанда 40% өсті, ал жүк алушылар жүктерін түсіру 23% артты. Маневрлік локомотивтердің саны нормативтік есептеулерге сәйкес келеді.
Станцияда бос вагондардың жинақталуы байқалуда. Бос вагондардың он тәуліктік қоры, бұл 350 жабық вагон, 9 станция жолын алады. Бұл ретте станция тәулігіне 90 жабық вагонға дейін тиеуге қабілетті. Қазіргі уақытта жағдай реттелуде.
Сонымен қатар, кірме жолдарда жүргізілетін операциялардың көлемі 63% өсті. Кейбір жеке кірме жолдар қараусыз қалған және күрделі жөндеуді қажет етеді. Егер ол орындалмаса, онда қозғалыс қауіпсіздігіне қауіп төндіреді.
Кеңеске қатысушылар сындарлы диалог орнатып, бірқатар мәселелер бойынша келісімге келе алғанын атап өтті.
Мұндай кездесулер тұрақты негізде өткізілетін болады.