Ақтау порты логистикалық торапқа айналады
Маңғыстау облысы бойынша меншікті тілші
Ел Президентінің тапсырмасы бойынша басталған контейнерлік хаб салу жобасы Ақтау теңіз портының терминалдық қуатын кеңейте түсері сөзсіз. Сондай-ақ оны жылына 300 мың TEU контейнерлерін өңдеуге қабілетті ТХКБ, Солтүстік-Оңтүстік бағыттарындағы негізгі логистикалық торапқа айналдырады.
Бұл туралы жақында Ақтауда өткен 3 күндік жиында сөз болып, жан-жақты талқыға салынды. Порттың баспасөз қызметінің мәліметі бойынша аталған басқосуда Ақтау мен Ляньюнган порттарының, «ҚТЖ -Экспресс» АҚ және «КИТНГ» жобалау ұйымының мамандары Ақтау портының жобалық контейнерлік хабының технологиялық үдерістерін құрастыру мен үйлестіруді оңтайландыру мәселелерін талқылады. Атап айтқанда, нысан құрылысының бірінші кезеңі кем дегенде 70-80 мың TEU контейнерлерін өңдеуге мүмкіндік береді екен. Сонымен қатар қажет болып жатса, одан әрі ұлғайту мүмкіндігі бар қуат көздерін құруды көздейді.
Жоба толық іске асқаннан кейін зор мүмкіндіктерге жол ашылады, оның артықшылықтары да көп. Соның ішінде қазақстандық жүк жөнелтушілерге жеткізу мерзімі жағынан оң әсер етіп, контейнерлік тасымалдарды орта және ұзақ мерзімді жоспарлауға ықпал ететін болады дейді мамандар.
Еске сала кетсек, Ақтау порты базасында контейнерлік хаб құрылысы «Қуатты өңірлер – ел дамуының драйвері» ұлттық жобасы аясында жүзеге асуда. Хабтың салынуы теңіз контейнерлерін кері тиеуді қамтамасыз ету есебінен жүктерді теміржол вагонынан контейнерлерге қайта тиеу алаңын, халықаралық жүк тасымалдау желілерінің контейнерлерін тарту және сақтау орындарын құру арқылы бірқатар мәселелерді шешетін болады.
Былтыр «Ақтау порты базасында контейнерлік хаб салу» жобасының техникалық-экономикалық негіздемесі әзірленді. Жоба әлеуетті инвестормен бірлескен кәсіпорын форматында жүзеге асырылуда және ол 2025 жылы аяқталады деп күтілуде.