Семейде көмір тасымалы қарқынды жүріп жатыр

Шығыста көмір тасымалы қарқын ала бастады. Семейлік теміржолшылар аймақты көмірмен қамту мақсатындағы шараларды күшейтіп, әсіресе жүк пойыздары құрастырылып, вагон сұрыптау жұмыстары тұрақты жүргізілетін Дегелең мен Жаңа-Семей, Семей станциясына біршама салмақ түсуде.

Жалпы, Семей ЖТ бөлімшесі бойынша жүк тасымалының негізгі басым бөлігін көмір жеткізу құрайды. Жүктің бұл түрін тиеу мен түсірудегі жұмыстар тіпті жазғы мезгілдің өзінде күн тәртібінен түскен емес. Биылғы жылғы жоспарлы шаралар пысықталып, отын тасымалындағы нақты көлем межеленген. Қазіргі уақытта жергілікті операторлар мен «Қаражыра» АҚ басшылығымен кездесулер өткізіліп, көмірді уақытында жеткізу мәселесі жиі талқылануда.  

Анықталған жайт, бір ғана Абай облысының көмірге деген жалпы қажеттілігі 1 млн 248 мың тоннаны құрайды. Оның ішінде: жылу көздері үшін 595 мың, жеке сектор үшін 567 мың, әлеуметтік нысандар үшін 85 мың тонна. Қатты отын облыс көлеміндегі теміржол тұйықтары арқылы босатылатын болады. Қазіргі таңда облыс бойынша 44 қазандық, 330 дербес қазандық бар. Олардың барлығына көмір жеткізілуде.  

Сонымен қатар атқарушы билік өкілдері Семей ЖТ бөлімшесі басшылығымен бірлесіп теміржол тұйықтарына тексерулер жүргізуде. Қазіргі уақытта барлық қоймалар жылыту маусымына толығымен дайын. Әрқайсысына күн сайын 5 вагон көмір жеткізілуде. Бұл көлемді жылыту маусымы қарсаңында тәулігіне 9 вагонға дейін арттыруға мүмкіндік бар. Тасымалдау 1 шілдеден басталған болатын.  

Ең бастысы, тұрғындар қыркүйек-қазан айларында көмірдің жетіспеушілігін болдырмау үшін көмірді алдын ала сатып ала алады. Қазіргі күні теміржол тұйықтарындағы көмірді босату бағасы тоннасына 14 700 теңгені құрайды. Бұл – республика бойынша ең төмен баға. Облыс бойынша көмір сатумен айналысатын 8 теміржол тұйығы жұмыс істейді.  

Мамандардың ақпараты бойынша көмір бағасына мониторинг жүргізіліп, заң бұзушылықтар анықталған жағдайда тиісті шаралар қабылданатын болады. Олар тарапынан тұрғындарға жылыту маусымы басталған шақта көмір тапшылығы болмас үшін жаз айларында көмір сатып алуға кеңес берілуде.  

Қазіргі таңда тамыздың 15-і күнгі жағдай бойынша облыс бойынша барлық теміржол тұйықтарында жалпы көлемі 8100 тонна қатты отын бар. Тасымал көлемі алдағы уақыттарда біртіндеп ширатыла беретін болады.