Қазақстан Еуропа мен Қытайды байланыстырып тұрған үлкен транзиттік хаб – "KTZ Express" басшысы
![](https://rail-news.kz/uploads/2024/09/06/VF5tnlWOAy3fM496akumtVmK3S7BoKVzb7CrVbY8.jpg)
![](https://rail-news.kz/img/noimg.png)
"Қазақстан теміржолшысы" газетінің тілшісі
«Астана» халықаралық қаржы орталығында «Astana Finance Days» (AFD2024) конференциясы өтіп жатыр.
Бұл бүкіл Еуразия өңірінің қаржы саласының қазіргі заманғы проблемаларын, үрдістері мен мүмкіндіктерін талқылауға арналған диалог алаңы. Жыл сайын мемлекеттік органдардың өкілдері, қаржы саласының жетекші сарапшылары, инвесторлар мен бизнес-көшбасшылар – барлығы 3000-нан астам адам конференцияға қатысады, бұл оны Орталық Азияның қаржы саласының өзекті мәселелері мен үрдістерін талқылауға арналған негізгі платформа етеді.
Конференция барысында «Бір белдеу, бір жол» жобасы назардан тыс қалмады. "KTZ Express" АҚ-ның бас директоры Дамир Қожахметов аталған бастаманың транзитті дамытудағы маңыздылығына тоқталды.
«Қазақстан Еуропа мен Қытайды байланыстыратын транзиттік орталық болып табылады және біз компания ретінде тұтынушыларымыздың өз тауарларын барынша қысқа мерзімде тасымалдай алуы үшін бар күшімізді салудамыз. Біз бірлескен жобаларды әзірлеген алғашқы компанияның бірі болдық. Қытайдағы Ляньюньган портымен бірлескен кәсіпорын құрдық, 2017 жылы сол портпен екінші жоба – Қытай мен Қазақстан шекарасында негізгі Қорғас терминалын аштық», - деді Д.Қожахметов.
![](https://rail-news.kz/uploads/attachments/zha-9279-panorama-3024x2018-66dacf5d1bbce.jpg)
Дамир Қожахметовтың айтуынша, Ляньюньган портымен үшінші жоба – Ақтауда іске қосылды. Бұл Орта дәліз бойында қытайлық серіктестермен бірлесіп жүзеге асырылатын маңызды инфрақұрылым жобасы болмақ.
Шанхай қор биржасының атқарушы вице-президенті Лю Хао «Бір белдеу, бір жол» жобасы аясында қазақстандық компаниялармен жұмыс істеп жатқандары жайлы айтты.
«Біз қазақстандық компаниялармен тығыз қарым-қатынаста жұмыс істеп жатырмыз. Мен мұнда алғаш рет 2011 жылы келдім, бұл компания қазірдің өзінде «KAZ Minerals» деп аталады. Гонконг қор биржасына екінші рет – 2017 жылы – біз АХҚО құрылған кезде жұмыс істей бастадық және біз сол кездегі қаржы орталығының жергілікті емес алғашқы қатысушылары болдық. Қазір Қазақстан мен Қытай, Қытай мен Орталық Азия елдері арасындағы сауда қатынастары дамып келе жатқанын көріп отырмыз», - деді ол.
TF International Securities компаниясының «Бір белдеу, бір жол» дамыту департаментінің тең басшысы Лоуренс Цанг компанияның Орталық Азиядағы жұмысы жайлы айтты.
«Біз бұл бастамаға (Бір белдеу, бір жол) көптен бері қатысып келеміз. Біз екі аймақта - Орталық Азия және Таяу Шығыста жұмысымызды жандандыра түспекпіз. Орталық Азияда біз Қазақстанмен ынтымақтастықта жұмыс істеп жатырмыз. Біз белгілі бір қаржылық байланыстарды дамытқан кезде, жобаларды инвестициялай бастадық. Өйткені бәсекеге қабілеті жоғары компанияларды көрдік, олардың көбінің Гонконгтағы IPO-ға шығу мүмкіндігі бар», - деді Лоуренс Цанг.