Жүк тасымалын тиімді ұйымдастыра білу де өнер

Елімізде теміржол арқылы жүк тасымалы қарқынды дамуда. Ол ең алдымен ұлттық компанияның көлік-логистикалық әлеуетін дамытып, жүк тасымалы қызметін тиімді ұйымдастыруды  бірінші орынға шығаруы нәтижесі деп білген жөн.

«ҚТЖ-Жүк тасымалы» Ақтөбе бөлімшесі филиалының Тасымалдау шарттары мен ұйымдастыру бөлімінің басшысы Клара Шатаякова салада жасалып жатқан жұмыстар, транзит көлемінің артуы, жалпы тоғыз жолдың торабында жатқан Батыс аймағында тасымалдау қызметінің ұйымдастырылуы жайлы әңгімелеп берді.    

– Қазіргі уақытта елімізде теміржол арқылы жүк тасымалы өте белсенді дамып жатыр. Соның ішінде сырт елдермен байланысты айрықша атауға болады. Елімізде теміржол арқылы жүк тасымалы әлемнің түкпір-түкпірімен ұйымдастырылып отыр. Халықаралық жүк пойыздары жиі өтеді. Батыс өңірінде де Ресеймен шекаралас станцияларда ұйымдастыру жұмыстары жолға қойылған. Никельтауда, Озинки, Илецк станцияларында жүк қабылдау тәртібі қатаң сақталып,  жүк қабылдаушылар әр вагондағы бекітпені мұқият тексереді.   Халықаралық жүк вагондарынан қандай да бір ақау анықталса, екінші жақ қабылдамайды. Барлық жұмыс қадағалану құжатпен мөрленіп, әр әрекет есепке алынады, Қысқасы, әр істі дұрыс ұйымдастыру маңызды. Ұйымдастыра білген ұтады, – дейді бөлім бастығы.  

Айтуынша, ішкі жүк тасымалы да  өте  маңызды. Теміржол арқылы жүк тасымалы таңдалғаннан кейін олардың жолда тұрып қалмауы, құжатының дұрыс болуы қатаң тексеріледі.  

– Біздің қызметкерлер жүк тасымалы қызметінің толық ұйымдастырылуына, яғни жүкті қабылдап алғаннан тиісті жеріне жетіп тапсырғанға дейін жауапты. Жылжымалы құрамның жолда тұрып қалмауы, бекітпелердің босап кетпеуі, сұйық жүктердің ақпауына дейін мұқият тексеріледі, – деді Клара Шатаякова.