Атырау бөлімшесінде жүк тасымалы артты: Бірінші тоқсанның нәтижелері көңіл қуантады

Атырау жүк тасымалы бөлімшесі өндірістік көрсеткіштер бойынша алғашқы тоқсанды табысты аяқтады. Директорлар кеңесінің жоспарына сай үш айда 8 пайдалану көрсеткішінің 7-і орындалған.  

Өндірістік-техникалық бөлім бастығының орынбасары Нелли Матаеваның мәліметі бойынша, орташа тәуліктік тиеу 103,7%, жүктерді тиеу тоннаға шаққанда 105,2% орындалып, яғни 3294 мың тонна жүк тиелді. Вагонға статикалық жүктеме 101,5%; техникалық станцияда вагонның орташа тоқтау ұзақтығы 117,7%; 1 жүк операциясындағы вагонның орташа тоқтау ұзақтығы 110,5%; пойыздар қозғалысының орташа техникалық жылдамдығы 104,4 %, пойыздың жалпы салмағы 101,6% орындалды. Тек орташа тәуліктік жүк түсіру 79,9 пайызға орындалып, тәулігіне жоспардағыдан 61 вагон кем болған. Бірақ техникалық жоспар бойынша 115,2 пайызға жеткен.  

Тастанды пойыздардың тұрып қалуынан техникалық станцияда вагонның орташа тоқтау ұзақтығы техникалық жоспарға сәйкес 95,2%-ды құраған. Яғни 3 айда жолда 30 пойыз/2078 вагон 82 306 сағатқа тұрып қалған. Құлсары, Махамбет, Сағыз, Теңдік, Қарабатан станцияларында транзитті вагондардың жиналып қалуы, диспетчер нұсқауын, пойыздардың келуін, локомотивтерді күту себепті кідіріс болған. Кейде жол бос болмайды, кейде пойыздар маршруты өзгереді, қосылатын вагондар күтіледі, т.т.  себептер вагондардың тұрып қалуына әкеледі. Аймақта жинақтайтын, шығаратын пойыздардың көбеюі, кейбір учаскелерде жылдамдықты сағатына 40 км дейін шектеу, технологиялық «толаскездің» берілуі, жолда мал жүруіне байланысты локомотивті шұғыл тежеу, метеорологиялық жағдайлар – қар мен жауынның көп болуына қарамастан орташа учаскелік және техникалық жылдамдық қалыпты орындалған. Яғни өңірде жыл сайын жүргізіліп жатқан темір жолды күрделі жөндеу жұмыстары нәтиже бере бастады деуге болады.  

Атырау бөлімшесі бойынша ірі жүк тиеп-жөнелтушілер болып табылатын «Батыс Транс Групп» пен «Тенгизшевройл» ЖШС мұнай және мұнай өнімдерін, «Исткомтранс» ЖШС, «Теңіз Көлік Компания» мекемесі күкірт тиейді. Сондай-ақ «PTC HOLDING» мекемесі полипропилен , «Иси Гипс Индер» құрылыс жүктерін, «Индер Гипс» ЖШС мен «Индер туз компани» ЖШС өнеркәсіптік шикізат жүгін, «Сұйытылған мұнай газын сақтау паркі» сұйытылған газ жүгін тиеген. Биыл жүк тасымалы артады деген болжам орындалып жатқандай. Өйткені жүк жөнелтушілер Қарабатан станциясына 2,5 млн полиэтилен, бутадиен сынды жүк жөнелтуді, сондай-ақ Ескене станциясынан 1,5 млн тонна газ жөнелтуді жоспарлап, ол біртіндеп жүзеге асып келеді.