Бірінші жартыжылдықта ҚТЖ желісінде экспорттық тасымалдың өсуі тіркелді

Жедел деректер бойынша 2025 жылдың 6 айында 150,1 млн тонна жүк тасымалданған, бұл 2024 жылдың сәйкес кезеңімен салыстырғанда 4% артық, деп хабарлайды Rail-news.kz.  

Экспорттық тасымалдар тұрақты өсім көрсетуде — экспорт көлемі 9% артты. Атап айтқанда, астық экспорты — 65%, құрылыс жүктері — 37%, өсімдік майы — 27%, тыңайтқыштар — 16%, көмір — 14%, мұнай — 9% және құрама жем көлемінің 4,7 есеге өсуі тіркелді.  

Экспорттың ең үлкен өсімін көрсеткен негізгі жүк жөнелтушілердің арасында: ERG компаниялар тобы (+8%), «Богатырь Көмір» ЖШС (+19%), «Qarmet» АҚ (+12%), «Қазсфосфат» ЖШС (+31%), «Казцинк» ЖШС (+23%), «Сарыарқа ENERGY» ЖШС (+83%), «Шұбаркөл Премиум» АҚ (өсім 3 есе), «Қаражыра» АҚ (+38%).  

Ағымдағы жылдың маусым айында «Шұбаркөл Көмір» АҚ экспортқа көмірді тиеудің жаңа рекорды — 841 мың тонна белгіленді, бұл 2025 жылдың орташа айлық көрсеткішінен 26% артық. Рекордқа теміржолшылар мен тасымалдау процесіне қатысушылардың үйлесімді жұмысының арқасында қол жеткізілді.