Қазақстаннан Қытайға өсімдік майының пилоттық партиясы жеткізілді
2025 жылдың 2 қыркүйегінде Шығыс Қазақстан облысынан флекстанк орнатылған 40 футтық контейнерлерде қазақстандық өсімдік майының пилоттық партиясы жөнелтілді. Жүк 4700 шақырым жолды 12 күнде еңсеріп, Цзянсу провинциясына жетті, деп хабарлайды Rail-news.kz.
Бұл жеткізілім логистиканың тиімділігін және «Қазақстан темір жолы» ҰК» АҚ-ның Қытайға тұрақты тасымалдарға дайындығын растады.
Жоба стратегиялық сипатқа ие: ол қытай нарығын игеруге және контейнерлік тасымалдарды дамытуға бағытталған, бұл Қазақстан Республикасы Президентінің алға қойған міндеттеріне сәйкес келеді.
Пилоттық жеткізілімнің жүзеге асуы отандық өндірушілер үшін жаңа мүмкіндіктер ашып, Қазақстан мен Қытай арасындағы сауда-экономикалық ынтымақтастықты нығайтуға ықпал етеді.
10–11 қыркүйекте Қорғас станциясында өткен келіссөздер барысында «Үрімші темір жолы» өкілдерімен тараптар жобаны кеңейтіп, майды 20 және 40 футтық контейнерлерде жүктеу талаптарын қатаң сақтай отырып, тұрақты жеткізілім ұйымдастыруға ниетті екенін растады.
Осылайша, жоба ұзақ мерзімді ынтымақтастық пен Қазақстанның экспорттық әлеуетін одан әрі арттыруға мықты негіз қалайды.