80 мың вагон тасымалға жегілген
«Қазақстан теміржолшысы» газетінің тілшісі
Биылғы жылдың қыркүйек айы еліміздегі жүк вагон паркінің ең ірі операторы «Қазтеміртранс» АҚ үшін табысқа толы болды. Осы айда аталған компанияның 80 мыңнан астам ашық және жабық вагонымен жүк тамсымалданған.
Мәселен, республика ішіне және экспортқа барлығы тас көмір тиелген 49 мың ашық вагон жөнелтілген. Соның ішінде 5,1 мыңнан астам көмір тиелген вагон экспортталған. Сонымен қатар темір және мырыш кені 6 мыңнан астам вагонға, түсті руда мен күкірт шикізаты 4,7 мың вагонға, құрылыс жүктері 11 700-ден астам вагонға және 1000 астам вагонға импорттық жүктер тиелген. Ал ел ішіне және сыртқа жабық вагондарда келесі жүк түрлері тиелген: 1,1 мыңнан астам вагонға тартылған ұн, 300 жуық вагонға құрамажем, 168-іне түсті металдар мен олардан жасалған бұйымдар, 1000 астам вагонға құрылыс жүктері, 1,1 мыңнан астам вагонға импорттық жүктер тиеліп, жөнелтілген.
«Қазтеміртранс» АҚ вагондарымен тасымалданатын жүктердің басым бөлігін сусымалы, яғни көмір, шағыл тас, кен сияқты жүктер құрайды. Сонымен қатар ыдысты-даналанған жүктер, астық, құрылыс жүктері, тағы басқа тауарлар да тасымалданады. Компания перспективалы даму бағыттарына айрықша ден қойып отыр. Олардың қатарында жүк тасымалдаушы жылжымалы құрамдар паркін жаңалау, корпоративті басқару жүйелерін жетілдіру, сондай-ақ қызметтер сапасы мен әлемдік стандарттар үлгісіне сәйкес келу сияқты басты бағыттар бар.