Қазақстан астығы Әзербайжан арқылы алғаш рет Арменияға жөнелтілді
Астық тиелген Қазақстан пойыздары Әзербайжан арқылы алғаш рет Арменияға жөнелтіле бастады, деп хабарлайды Rail-news.kz сайты 1news.az сілтеме жасап.
21 қазанда Қазақстанға мемлекеттік сапары барысында Ильхам Әлиев Әзербайжан Арменияға оккупация кезінен бері қолданылып келген жүк транзитіне қойылған шектеулерді алып тастағанын мәлімдеген болатын.
«Қазір жүктер Әзербайжан арқылы транзитпен Арменияға жөнелтіліп жатыр. Кеше жалпы салмағы 1048 тонна 800 килограмм болатын 15 вагон астық Ресейден Әзербайжан аумағы арқылы Арменияға жіберілді. Олар Беюк-Кясик станциясынан шықты, жүктер алдымен Грузияға, содан соң Арменияға жеткізіледі», – деді «Әзербайжан темір жолдары» ЖАҚ коммуникациялар департаментінің қоғаммен байланыс бөлімінің басшысы Бахтияр Гаджиев.
Б. Гаджиевтің айтуынша, сондай-ақ Қазақстаннан Арменияға Әзербайжан арқылы астық тасымалдау да басталған.
Қазақстаннан келген жалпы салмағы шамамен 1000 тонна болатын 15 вагон астық 5 қарашада Әзербайжанға жеткен. Құрам қазір Баладжары станциясында тұр, әрі қарай Баладжары – Гаджигабул – Беюк-Кясик бағыты бойынша жол тартып, жүктер Беюк-Кясик станциясынан жөнелтіледі.
Алдағы уақытта Арменияға Әзербайжан арқылы Ресей мен Қазақстаннан тағы да жүк партиялары жіберіледі деп күтілуде.