Түбектегі тасымал жандана түсті

Маңғыстау темір жолымен астық тасымалы бірнеше есеге артқан. Өткен жылы желтоқсан айына дейін Ақтау теңіз портындағы Ақбидай және Оңтүстік терминалдарымен 380 мың тонна бидай жөнелтілсе, биыл 853 мың тоннаға жеткен. Бұл көрсеткішті Құрық портындағы екі астық терминалы тағы да ұлғайтып отыр.

Маңғыстау жүк тасымалы бөлімшесі логистика бөлімінің басшысы Айбек Өтековтің мәліметінше, межелі мерзім ішінде түбек теміржолымен астық тасымалы бұрынғыдан анағұрлым көбейген. Былтыр Ақтау портындағы терминалдармен 110 кеме бидай жөнелтілген болса, биыл 262 кеме ауыстырып тиелген. Желтоқсан айында бұл процесс тағы да қарқынмен жалғасып жатқанын есепке алсақ, жылдың аяғына дейін көрсеткіш рекордтық деңгейге жететін түрі бар. Құрық портындағы өткен жылдың соңғы тоқсанында іске қосылған қос астық терминалындағы жағдай да жақсы. 2024 жылы қыркүйектен жыл соңына дейін алты кеме жөнелтілген еді, биылғы 11 айда 372 мың тонна жүк ауыстырып тиелген.  

Соңғы кезде көшке қайта қосылған Бейнеу астық терминалы да өз қарқынымен жұмыстарын жандандыра бастаған. Осы жылдың басынан бергі 11 айда 83 вагон-5700 тонна астық түсірген. Түркімен теміржолына жаз айларында 15 вагон өнімін жіберсе, енді Әзербайжан, Өзбекстанға қарай жөнелтетін жүктерін дайындауда екен. Бұдан бөлек жергілікті халыққа да түрлі бидай өнімдерін шығарып, соған қажетті астықты тасымалдап отыр.  

Түбектегі осындай оң өзгерістердің нәтижесінде темір жолдағы жалпы жүк айналымы артқан. Он бір айлық жоспар 111,8 пайызға орындалған. Жүк тиеу 107,6 пайызға жеткен. Жүк түсіруде де жоспар жеті вагонға көбейген немесе күніне орта есеппен 278 вагон түсірілген.  

– Өңірдегі жүк айналымы былтырғыға қарағанда жоғары. Биыл бұл тұрғыдан жүк тасымалына әсер ететін біраз өзгеріс болып, нәтижелер де соған сай жақсарып жатыр. Мәселен, ТХКБ бағытындағы көрсеткіштер өткен жылғыдан едәуір көп. Межелі мерзімде 225 кеме жіберілді. Оның ішінде 42 мың контейнерлік ауыстырып тиеу болды. Құрық портынан да жүк жөнелту деңгейі артты. Қараша айына дейін 1 млн 20 мың тонна жүк ауыстырып тиелді. Өткен айда басталған жөндеу жұмыстарына байланысты жұмыс сәл бәсеңдеді, соның себебінен көрсеткіштер былтырғымен бірдей деңгейді сақтады. Құрық портынан «Оңтүстік» портқа дейінгі станцияда жаңа тұйықтар ашылды. Оған 1440 жабық вагонмен, 50 платформа, 168 фитингілік контейнермен жүктер келді. 95 мың тонна жүк жөнелтілді. Былтыр 658 вагон түсіріліп, 60 мың тонна жүк жіберілген еді, – дейді Айбек Өтеков.  

Болашақ – Түркіменстан бағытындағы жүк айналымы да артып, 1 млн 357 мың тонна жүк тасымалданған. Өткен жылғыдан 157 мың тоннаға көбейіпті. Алдағы уақытта тағы да жандана түседі деген болжам бар. Контейнерлік тасымал да күннен күнге артуда. Құрық портындағы жұмыстар бұдан былай бірнеше есеге дейін ұлғаяды деп күтілуде. Бұл порттан тасымал көлемін болашақта жеті миллион тоннаға дейін көбейту жоспарланған.