Алашаңқайдың әлеуеті артқан
«Қазақстан теміржолшысы» газетінің тілшісі
Қытайдан Еуропаға Қазақстан арқылы өтетін тауар көлемі артып отыр. Әсіресе көрші елмен шекарадағы Алашаңқай теміржол өткелінің тиімділігі өскен. Алашаңқай теміржол бекетінің техникалық бөлім жетекшісі Чжан Юбиньнің мәліметіне сәйкес, былтыр бұл шекаралық өткел арқылы 29 млн тоннадан астам транзиттік жүк өткен.
Жалпы, Алашаңқай теміржол өткелі Шыңжаң ұйғыр автономдық ауданындағы Қазақстан мен Қытай арасындағы экономикалық және тауар айналымының негізгі қақпасы болып саналады. Қазақстанмен шекарадағы өткел Қытайды 21 елмен байланыстырып тұр. Дәл қазіргі кезде Алашаңқай арқылы 128 бағытта жүк тасымалданып жатыр. Соның ішінде Достық станциясы байланыстыратын Қазақстан да бар. Аталған бекет негізгі қабылдау торабы ретінде қызмет атқарады және қазақстандық бағытпен тығыз үйлесімде жұмыс істейді.
– Шекарадағы Алашаңқай теміржол өткелінің тиімділігі артып келеді. Бұл Қытайды Орталық Азия елдері және Еуропамен байланыстырып тұрған солтүстік-батыстағы негізгі күре жол. Жүк тасымалы жылдан жылға көбеюде. Қазір кеден рәсімдерін оңтайландырып, жүк пойыздарын жөнелту кестесін жүйелеп жатырмыз. Уақыт үнемдеуге оң ықпалын тигізді. Бүгінде темір жол арқылы жөнелтілетін жүк көлемі 5,3 пайызға өсті, – дейді Алашаңқай теміржол бекетінің техникалық бөлім жетекшісі Чжан Юбинь.
Достық және Алашаңқай теміржол станциялары – Қазақстан – Қытай халықаралық көлік дәлізі учаскесінде орналасқан және екі ел арасындағы жүк тасымалы мен транзиттік ағынды қамтамасыз ететін бір-бірімен тығыз байланысты стратегиялық нысандар.
Қазақстан темір жолының Достық станциясы Жоңғар қақпасының етегінде, Ұлы Жібек жолының тарихи бағытында орналасқан. Инфрақұрылымы дамыған станция шекаралық жүк тасымалдарын тұрақты ұйымдастыруға қабілетті, екі ел арасындағы сауда-экономикалық ынтымақтастықты дамытуға серпінді қызмет етіп келеді. Қазіргі уақытта Достық станциясында инфрақұрылымды жаңғыртуға бағытталған кең ауқымды бағдарлама жүзеге асырылуда. Тасымал процестерін үздіксіз қамтамасыз ету және кептелістердің алдын алу мақсатында жаңа қабылдау және жөнелту паркінің құрылысы жүргізіліп жатыр, сондай-ақ қолданыстағы өткізу желілері кеңейтілуде. Достық пен Алашаңқай станцияларында инфрақұрылымдық жобаларды іске асыру транзиттік әлеуетті одан әрі арттыруға және Қазақстанның халықаралық көлік-логистика жүйесіндегі стратегиялық рөлін нығайтуға айтарлықтай ықпал ететін болады.