Қазақстан мен Ресей арасындағы контейнерлік тасымал 5 жылда 8,3 млн тоннаға дейін өскен
Қазақстан-Ресей шекарасы арқылы контейнерлік тасымал көлемі соңғы 5 жылда 5 еседен астам 1,6-дан 8,3 млн тоннаға дейін артты. Сонымен бірге, Қазақстанда жүк ағындарының контейнерлену деңгейінің екі есеге жуық өскені тіркелді. Мұндай мәліметтер Еуразиялық даму банкінің (ЕАДБ) хабарламасында келтірілген, деп хабарлайды Rail-news.kz.
«Қазақстан: соңғы 5 жылда контейнерленудің екі есеге жуық өсуі. Бұл ретте Транскаспий халықаралық көлік бағыты (ТХКБ) бойынша контейнерлік тасымалдар үш есе өсіп, 2025 жылы 76,9 мың ЖФЭ-ге (ДФЭ) жетті. Қазақстан-Ресей шекара өткелдері арқылы контейнерлердегі жүк тасымалдау көлемі 1,6-дан 8,3 млн тоннаға дейін өсті», - делінген банк шолуында.
ЕАДБ сарапшыларының бағалауынша, өңірдегі жүк ағындары әрі қарай да өсе береді. Мамандар «Орталық Азиядағы контейнерлік тасымал көлемінің алдағы өсімі көп жағдайда Қытаймен байланысты» екенін баса айтады.
«Қазақстанда контейнерлік тасымалдың тұрақты өсуі ТХКБ қуаттылығын арттырудың, теміржол учаскелерін жаңғыртудың және Бақты- Шәуешек жаңа шекара өткелі арқылы Қытайға шығатын үшінші теміржол жолын салудың нәтижесі болмақ», - делінген хабарламада.
Еуразиялық даму банкі экономикалық байланыстарды нығайту және қатысушы елдердің дамуына жәрдемдесу мақсатында Еуразияда инвестициялық жобаларды іске асыратын халықаралық қаржы ұйымы. Қазіргі уақытта ЕАДБ құрамына Армения, Беларусь, Қазақстан, Қырғызстан, Ресей және Тәжікстан кіреді, ал 2025 жылы банкке Өзбекстан да қосылды.