Келер жылы «Локомотив бригадасына арналған мобильді қосымша» қолданысқа енеді
Шымкент қаласы бойынша меншікті тілшісі
Алдағы жылы «Локомотив бригадасына арналған мобильді қосымша» енгізілмек. Жаңа жоба локомотив шаруашылығын цифрландырудың үлкен жетістігі болады деген болжам жасалып отыр, деп хабарлайды Rail-news.kz. Бұл туралы Шымкент жүк тасымалы бөлімшесінде «ҚТЖ – Жүк тасымалы» ЖШС бас директорының орынбасары Қанат Көбесов пен «Транстелеком» АҚ операциялық қызметтер бойынша басқарма төрағасының орынбасары Мұрат Ахметовтің қатысуымен өткен жиында жан-жақты сөз болды. Жергілікті теміржолшылар, локомотив деполарының өкілдері қатысқан жиын тақырыбы теміржол көлігінде заманауи цифрлық ІТ технологияларды қолдану болды. «Локомотив бригадасына арналған мобильді қосымша» функциясы туралы Қанат Көбесов жан-жақты түсіндіріп өтті. Оның айтуынша, мобильді қосымша қолданыстағы банктердің қосымшасы сияқты оңай да өте тиімді болмақ, және ол келесі жылдан бастап іске қосылады деп жоспарланып отыр.
«Цифрландыру – локомотив шаруашылығына да жетті. Локомотив бригадасына арналған мобильді қосымшада кез-келген тепловоз бен электровоздың қайда жүргенін, бүкіл қимыл-қозғалысын спутник арқылы көріп отыруға болады. Оған қоса, маневр тепловозын да қай станцияда, қай тұйықта жүр және қандай жұмыс атқаруда, локомотив қанша жанар-жағармай жұмсады, бәрін бақылауға болады. Сонымен қатар, машинист те өзінің қашан медициналық комиссиядан өтетінін, қашан сынақ тапсыратынын, қанша сағат жұмыс істегенін, т.т. біліп отырмақ. Мұның бәрі де келешекте жұмыстың үнемді, таза, ашық болу үшін жасалуда», - деді Қанат Көбесов.
Бұдан бөлек, жиында техникалық шығындар бойынша рационализаторлық ұсыныстар, өндірістік қауіпсіздік, қозғалыс қауіпсіздігінің бұзылуы, алдағы жылға арналған кешенді жоспарлар да сөз болды.