Цифрлы байланыс сапаны арттырды
Атырау облысы бойынша меншікті тілші
Атырау белгі беру және байланыс дистанциясының ұжымы өздері қызмет көрсететін аймақта цифрлы технологияның рахатын көріп отыр. Бүгінде уақыт талабына сай барлық құралдар электрлендірілген және цифрлық басқаруға көшуде.
Дистанция қызмет көрсететін телім Атырау мен Д.Нұрпейсова станцияларының аралығындағы 293, 6 шақырымды құрайды. Осы аралықта 22 станция мен 22 жекелеген пункт бар және осындағы 274 бұрма, 689 белгі беру, екіжақты 294 сигнал құрылғылары электрлендірілген орталыққа қосылған. 25 өткел АПС құралымен, ал барлық шағын бекеттер АЛСН қондырғысымен жабдықталған.
Дистанцияның тәжірибелі СОБ электромеханигі Құбайдолла Досмұханов еңбек ететін Тұманды бекетінде де белгі беру-байланыс құрылғылары жаңарған. Айтуынша, барлық байланыс және белгі беру құралдары орнықты жұмыс жасап тұр. Бекет механиктерінің қызмет көрсету аясы 40 шақырымды, яғни Махамбет станциясы, 17-ші разъезд, Қызылжар, Тұманды бекеттері аралығын қамтиды. Станция арқылы тәулігіне 10 жүк және екі жолаушылар пойызы өтеді. Солардың бәрін қабылдау, өткізу байланыс құралдарының дұрыс жұмыс жасауына байланысты. Құбайдолла Досмұхановтың осы бекетте еңбек етіп келе жатқанына 44 жыл толыпты.
– Цифрлы технологиялар кереметін көріп отырмыз. Мәселен, КТСМ құрылғысы жүріп келе жатқан пойыз доңғалақтарының ақауын тез тауып, көрсетеді. Бәрі компьютерде тайға таңба басқандай көрініп тұрады. Сол секілді бағдаршам, бұрмалар, басқа да құралдар жұмысы, оларды уақытылы жөндеу де үнемі назарымызда. Станцияда ДХ-500 – цифрлы тікелей жедел техникалық байланыс та орнатылды, онымен барлық теміржол мекемелерімен шұғыл байланысқа шығу мүмкіндігі мол, қысқасы, цифрлы байланыс сапаны әлдеқайда арттырды, – дейді тәжірибелі теміржолшы.