Ағаш шпалдар ауыстырылуда

Шұбарқұдық станциясында жол табанын сауықтыру жұмыстары басталды. Станцияда бес жолда ағаш шпалдар темірбетонға ауыстырылуда. Жолға мал-жан шықпау үшін қоршау салу жұмыстары да қатар жүріп жатыр.  

Жол  жұмыстарын Шұбарқұдық жол дистанциясы жүргізуде. Жасалып жатқан жұмыстар легін дистанцияның жол шебері Қалыбек Әлқуатов баяндап берді. Оның қарамағында 25 жолшы болса, бәрі де жазғы жол жұмыстарына жұмылдырылыпты.  

«Қазір станцияның  8,6,5,4,3 жолдарында баяғыдан жатқан ағаш шпалдар ауыстырылып жатыр. Әр жолда жұмыс көлемі әртүрлі. Мәселен, үшінші жолға 100 темірбетон шпал салынды», – деді Қалыбек Әлқуатов.  

Жол шеберінің айтуынша, өткен жылы станциядағы бес жолға күшейтілген орташа жөндеу жұмыстары жүргізілген. Солардың арасында ауыспай қалған ағаш шпалдар биыл темірбетонға толықтай ауыстырылады. Техникалық талаптарға сай алдағы уақытта бұл жерде жылжымалы құрамның жылдамдығы да артады.

Шұбарқұдық станциясында орталықтандырылған 40 бұрма бар. Олардың барлығы автоматты түрде жұмыс істейді. Ал депо жолдарында 22 бұрма қолмен басқарылады. Жолшылар қауіпсіздік шараларына орай бағыттамалы бұрмаларды тазарту, шөп жұлу жұмыстарын да атқарып жатыр.  

«Үнемі қозғалыстағы бағыттамалы бұрмалардың жұмысын бақылап отырамыз. Бұрманың ұшы желініп, деңгейі түсіп кетсе, вагон доңғалақтары тайып, рельстен шығып кетуі мүмкін. Жұқарып қалмауы керек», – деді жол шебері.  

Сонымен қатар қазір Шұбарқұдық станциясы аумағында жолдың оң жағынан төрт шақырым қоршау салынды. Күзге дейін сол жақ бетіне де қоршау орнатылады.