Ақтөбе облысында жеті вокзал жөнделіп жатыр

Ақтөбе облысы бойынша Ақтөбе, Қандыағаш, Шалқар, Алға, Жем, Қарауылкелді және Шұбарқұдық станцияларында барлығы жеті вокзалда жөндеу жұмыстары қатар жүріп жатыр.

Барлық жұмыстардың белгіленген мерзімде және сапа талаптарына сай орындалуы жіті бақылауда. Мердігер ұйымдарға инженерлік-коммуникациялық жүйелерді қайта жаңарту міндеттелген. Жолаушылар платформаларының қауіпсіздігін қамтамасыз ету, мүгедектігі бар азаматтарға қолжетімділікті толық қамтамасыз ету секілді маңызды мәселелерге баса назар аудару тапсырылған.  

Жөндеу жұмыстары жүріп жатқан вокзалдардың дені – шалғайдағы станциялар. Жергілікті елдімекеннің көркі болған вокзалдардағы жөндеу жұмыстарын көрген ауыл тұрғындары марқайып жүр. Кейбірінің салынғанына ғасырдан асқан. Өткен аптада Ақтөбе облысы әкімінің орынбасары Асылбек Есенбаев Байғанин және Темір аудандарындағы теміржол вокзалдарын жаңғырту жұмыстарымен танысты. Вокзалдар маңын абаттандыру жұмыстары қатар басталған.

«Теміржол вокзалдары – өңірдің келбеті. Тұрғындарға, жолаушыларға қолайлы, қауіпсіз жағдай жасау – бәріміздің міндетіміз», – деді Асылбек Есенбаев.