Тараз вокзалының қос қабаты түгел жаңарады

Республика бойынша вокзалдарды ауқымды қайта құру жобасына Жамбыл облысынан енгізілген бес ғимараттың бірі – Тараз вокзалында қазір күрделі жөндеу жұмыстары қызу жүріп жатыр.

Нысанның айналасы түгел қоршалып, бас мердігер «СпецСтройЭксперт» ЖШС-нің бірнеше құрылыс бригадасы екі қабатты ғимараттың ішкі сылағын қырып, келесі топ шатыр астындағы ескі тіреу тақтайшаларды ауыстыруға кіріскен. Сметалық жоба бойынша күрделі жөндеу жұмыстарын 1 қарашаға дейін аяқтау көзделген.  

– Вокзал ғимаратының екі қабатына түгел күрделі жөндеу жұмыстары жүргізілуде. Бірінші кезекте шатырын, есік-терезелерін ауыстырады. Жасыратыны жоқ, сыртқы есіктер бір қабатты әрі жылу жүйесі ескі, сол себепті күту залдарында қыста салқын еді. Сондықтан алдымен осы мәселені ретке келтіруді сұрадым. Жолаушылар үшін күту залында қыста жылы, жазда салқын болғаны маңызды. Вокзалдың екі қабаты түгел жаңарады, бірақ сыртқы қасбеті осы күйінде қалады. Тек қана жарықтандырулар қойып, төбесіндегі «Қазақстан темір жолы», «Тараз вокзалы» деген жазуларды жаңартады. Сырттағы дизайнды түрлі жарықтандырулар арқылы шешеді. Сондай-ақ бірінші және екінші перронның брусчаткалары толықтай жаңартылады. Аулаға төбесін жауып, күту орындықтарын қою мәселесін де ұсынып жатырмын. Өйткені көктем-жаз айларында жолаушылар пойызды далада тұрып күткенді жөн көреді, – дейді Тараз вокзалының бастығы Дидар Мусреталиев.  

Вокзалда құрылыс жұмыстары жүргізіліп жатқанымен, жолаушылардың жайы да ұмыт қалмаған. Билет кассалары, күту залдары және басқа да сервистік аймақтар уақытша ауыстырылған. Вокзал бастығы сыртқа орналастырылған екі касса мен бір анықтама бюросын көрсетті. Ал касса алдына төбесі жабылып, күту орындықтары қойылыпты.  

– Қазір сырттағы екі билет кассасы мен анықтама бюросындағы қызметкерлерге қажет жағдайларды жасап бердік. Компьютер қойылды, керек бағдарламалар орнатылып, интернетке қосылған. Сыртқы күзет бар, Тараз желілік полиция қызметкерлері кезекшілікпен өз міндеттерін атқарып жатыр. Қауіпсіздік мәселесі назарда. Бір сөзбен айтқанда, халыққа қызмет көрсетуге мүмкіндік бар, – деп түсіндірді Дидар Ағаділұлы.  

Бұған дейін вокзалда 9 мемлекеттік, 4 жекеменшік касса жұмыс істеп келген. Енді алдағы уақытта «Жолаушылар тасымалы» АҚ-ның 2 кассасы ғана қалдырылады екен. Себебі билет алу және оны кері қайтару секілді процестердің дені онлайн жүйеге көшкен. Сатылым электронды жүйе арқылы жасалуда. Ал әлі де кассаның қызметіне жүгінетіндер үшін қалған екеуі жеткілікті болмақ. Ғимарат толық жаңғыртудан өткеннен кейін қызмет көрсету сапасы арта түсері анық. Дидар Ағаділұлының айтуынша, вокзалда 9 кассир, 20 жұмысшы, жолаушылардың жол жүгін тексеріп-бақылау пунктінің (жеке меншік компанияға қарасты) 27 қызметкері, аутсорсинг арқылы бекітілген 10 тазалықшы, «Жолаушылар тасымалы» АҚ-ның 7 маманы, жалпы 90-ға жуық адам жұмыс істейді екен.