Жуалыда теміржол асты көпірі кеңейтіліп, жаңғыртылуда
"Қазақстан теміржолшысы" газетінің Жамбыл облысындағы меншікті тілшісі
Жуалы ауданының орталығында орналасқан теміржол асты көпіріне жөндеу жұмыстары жүргізіліп жатыр. Аудан тұрғындары көпірдің тарлық ететінін айтып, мәселе көтеріп келе жатқанына біраз жылдың жүзі болған.
Міне, халықтың өтініш тілегіне орай өткелдің енін кеңейту жұмыстары биыл жүзеге асырылмақ. Теміржол асты көпірін жаңғырту жобасында екі жолақты автокөлік және жаяу жүргіншілер жолын салу жоспарланған.
Жасыратыны жоқ, осыған дейін өткелдің ені көліктердің тек бір бағыттағы қозғалысына ғана мүмкіндік беріп келген. Қарама-қарсы келе жатқандары арғы жақтағы машиналарды өткізіп жіберу үшін амалсыз күтуге мәжбүр. Мұндай жағдайда жаяу жүргіншілердің жолы туралы айтудың өзі артық.
Ендігі мәселе – жүргізіліп жатқан құрылыс жұмыстарының сапасын бақылауда ұстау. Бұл ең алдымен аудан тұрғындары мен жүргізушілердің қауіпсіздігі үшін қажет.