Күрделі жөндеу: 97 пайыз орындалған
Үстіміздегі жылы 401,286 км жолға күрделі жөндеу жүргізу жоспарланған болатын, ал тоғыз ай ішінде соның 383,3 шақырымы жөнделген.
Жол және құрылыс департаменті мәліметіне сүйенсек, аталған жөндеу жұмыстары барысында балластарды тазарта және толықтыра отырып, шпалдарды алмастыру жұмыстарына SMD-80 және рельстерді түйіспесіз рельстер иініне алмастыруға RM-80, ХДВ, ЭЛБ, ВПО3000, Duomatic, DGS, PBR машиналар кешені, сондай-ақ, рельстерді, шпалдарды, балластарды тұтастай алмастыруға УК25/9-18 краны пайдаланылған. Пойыздар жүрісінің бірқалыпты болуын қамтамасыз ету үшін ПРСМ рельс дәнекерлеу машинасын қолдана отырып, учаске блогына дейін түйіспесіз рельс иіндеріне дәнекерлеу жұмыстары жүргізіледі.
Күрделі жөндеу темір-бетонды шпалдар мен оське түсетін жүктеме 25 тоннадан кем болмайтын және де 200 км/сағатқа дейін қозғалыс жылдамдығын құрайтын берік клеммалары бар рельс бекітпелерін пайдалану арқылы жүргізілген.
Бүгінде жөндеу жұмыстарының арқасында 338 км жолдың ағаш шпалы темір-бетонды негізге көшірілсе, 41 км жолда асбестік балластың орнын шағылтас басқан. Сонымен қатар 72 км жолда Р 50 типті рельстер қуаттырақ Р65 түріне алмастырылып, 357 шақырымда бунақ жолдар түйіспесіз сипатқа ие болған.
Жол шаруашылығы мамандары, күрделі жөндеу солтүстік аймақ бойынша Есіл – Тобыл теліміндегі 21,17 км жолда, Павлодар – Ерейментау телімі бойынша 54,7 шақырымда, орталық аймақ бойынша Қызылжар – Жезқазған телімінде 70,85 шақырымда, шығыс өңірі бойынша Жаңа-Семей – Спутник және Достық – Саяқ телімдерінде 27,33 және 101,49 шақырымда жүргізілуде. Ал батыс аймақ бойынша Қазалы – Сексеуіл телімінде 28,29 шақырымда, Шалқар – Ақтөбе 24,72 шақырымда, сосын Мақат – Өзен аралығындағы 72,73 шақырымда жолдар күрделі жөндеуден өтіп, жаңа келбетке ие болған. Енді жыл соңына дейін 18 км шамасындағы жол көлемі күрделі жөндеу көрмек. Жұмыстар кестеге сай жүргізіліп жатыр екен.