Жол жөндеу жоспарға сай жүріп жатыр

Шу жол дистанциясының жолшылары Бірлік – Жиделі станциялары аралығындағы теміржолды Шу механикаландырылған дистанция күшімен орташа жөндеуден өткізуде.

Жамбыл магистральдық желі бөлімшесіне қарасты бұл телімде теміржол төсемінің ескірген қиыршық тастары жаңартылуда. Жол сапасын жақсарту және жазғы тасымал маусымына дайындық аясында атқарылып жатқан жұмыстар елдегі қалыптасып отырған жағдайға қарамастан жоспарға сай жүзеге асырылуда. Рельс астындағы 20042010 жылдары төселген қиыршық тастар қыста қардан, көктем мен күзде жаңбырдан әбден су шайып, ластанған және уақталып кеткен. Қазіргі таңда жөндеу жұмыстарының басы-қасында жүрген Шу жол дистанциясы директорының орынбасары Дәулетбек Жолдасбековтің айтуынша, бұл жұмыстар елде төтенше жағдай жарияланғанға дейін 9 наурызда басталыпты. Барлығы 18 км жолдың төсемін жақсарту жоспарланған, бүгінде жолшылар оның 15 шақырымын жасап бітті. Енді қалған 3 шақырымды 21 сәуірге дейін аяқтау көзделіп отыр.

– Жұмыс таңнан басталып, қас қарайғанға дейін телім басындамыз. Толаскез 10-12 сағаттан жариялануда. Бір жақсысы, бүгінгі жағдайға байланысты жолаушылар тасымалы тоқтап, толаскез алу оңай болып тұр. Жолаушылар пойызы мүлдем жүрмейді, жүк пойыздарының да қатары азайып кеткен. Басында шебінді іргедегі Шоқпар станциясындағы «Шоқпартас» ЖШС-нен алып жатқанбыз. Одан кейін олар жұмысын уақытша тоқтатып, кей ін Шағалтастан тасыдық. Олар да карантинге жабылғасын Жамбыл магистральдық желі бөлімшесінің Луговой станциясындағы базада қыста алдын ала дайындап қойған шебінді алып, жұмысты тоқтатпай жалғастырып жатырмыз. Жөндеу жұмысы кезінде дистанция басшысы Ғалымбек Батырбековтен бастап, телім бастығы, орынбасарлары, жол шеберлері осы жерде жүр. Магистральдық желі бөлімшесінің басшылығы телефонмен хабар алып, толаскезді қадағалап отыр, – дейді дистанция бастығының орынбасары.

Орташа жөндеу жұмыстарына Шу ПЧМ мекемесінен әр техника бойынша 4-5 адамнан, ЭЧ мен ШЧ-дан 6 адамнан және Шу жол дистанциясынан 18 адам жұмылдырылған.  

Жұмыс барысында сақтық шаралары толықтай сақталып отыр. Барлық жұмысшылар маскалармен, антисептиктермен қамтамасыз етіліп, оларды толық пайдалануда. Негізгі жұмыс техника күшімен жасалады.

Тек ең күрделі жұмыс Шу өзенін кесіп өтетін 3745 шақырымда 6 пикет тұсындағы үлкен көпір маңында болған. Сол көпір алдындағы 100 метр жердің жөндеу жұмысын жолшылар қол күшімен жасаған.

Рельс торын алып тастап, астын бірнеше қабат қолмен қазып алып, қиыршық тасын да қолмен төгіп, жаймалап, барлық жұмысты баппен қолмен атқарған. Себебі бұл жердегі теміржолдың орналасу деңгейі техникамен жасауға қолайсыз. Ал қалған жердегі теміржол төсемдерінің қиыршық тасын алдымен RМ техникасы тазалап өткесін, артынан кешенді машиналар жұмысы басталады. Алдымен хоппердозатор вагоны арқылы қиыршық тас рельс деңгейімен бірдей етіп төгіледі, оның артынан PBR техникасы әр рельс тұсын шпал көрінетіндей ашып өтеді. Сосын Дуомат техникасы рельсті көтеріп, қиыршықтасты ұрып, деңгейін тегістейді. Одан әрі ДГС техникасы қатты тығыздап шығады. Осылайша олар бір күнде 1 км астам жолды жөндеп келе жатыр. Оның сыртында жолшылар үшін қосымша жұмыстар жеткілікті. Олар бекітпесі, шпалы нашар жерлер кездессе ауыстырып, бұрандалар мен шруптарын қатты етіп бекітеді т.т. майда-шүйде жұмыстарын жасайды. Телім басына жолшылар УАЗ, КАМАЗ арнайы қызметтік көліктермен тасымалдануда.