Ақмолалық құрметті теміржолшы зейнетке шықты

Тәуелсіздіктің 30 жылдығы қарсаңында «Қазақстан темір жолы» ҰК» АҚ филиалы – Ақмола ЖТ бөлімшесінің Бірыңғай диспетчерлік басқару орталығының ұжымы теміржол саласына саналы ғұмырының 42 жылын арнаған әріптестері – Құрметті теміржолшы Болат Қасеновті зейнет демалысына шығарып салды. Болат Байделденұлы еңбек жолын 1979 жылы Целиноград теміржол техникумын бітіріп, Сарыоба станциясының кезекшісі болып бастап, станция бастығына дейінгі жолдан өткен. Бертін келе сұрыптау дөңесінің операторы, Целиноград паркі бойынша кезекші, пойыз диспетчері сияқты жауапты қызмет сатыларынан өтеді. 2002 жылдан күні бүгінге дейін бөлімше бойынша кезекші қызметін атқарып, зейнет жасына жетіп отыр. Тәжірибелі теміржолшының еңбегі елеусіз қалмай, бөлімше басшылығы тарапынан түрлі марапаттар мен сыйлықтар алған. Десе де, Болат Қасенов үшін бүкіл марапат атаулының ішіндегі бағалысы – әрине, «Құрметті теміржолшы» белгісі. Теміржолшылардың ең жоғары наградасы саналатын бұл атаққа тек абыройлы да адал еңбектің арқасында қол жеткізуге болатынын ескерсек, болат жолдың Болатының ары таза. Қашанда ұқыпты, өз ісіне аса жауапты және тиянақты Қасенов асқаралы алпысқа енді келгенімен, денсаулығының сыр беруіне байланысты сүйікті жұмысымен қош айтысуға мәжбүр болып отыр.

«Нағыз майталман маманның өнегелі өмірін сүрген сіздің еңбек жолыңыз өзіңіз тәрбиелеген жастарға үлгі болсын дер едім. Деніңіз сау болып, еңбегіңіздің жемісін көргейсіз», – деп тілегін білдірді Ақмола ЖТ бөлімшесі директорының шұғыл жұмыстар жөніндегі орынбасары Ербол Түсіпов әріптесін зейнеткерлікке шығарып салу салтанатында.

Болат Қасеновке бөлімше ұжымы мен кәсіподақ комитеті атынан бағалы сыйлық пен гүл шоғы тарту етілді. Сонымен қатар бұл жиында Бірыңғай диспетчерлік басқару орталығының бірқатар озаттары тәуелсіздіктің 30 жылдығы құрметіне түрлі наградалармен марапатталды. Олардың қатарында «Адал еңбегі үшін» төсбелгісімен марапатталған Гүлсара Ахметова, «ҚТЖ» ҰК» АҚ басқарма төрағасының Құрмет грамотасын алған Дархан Айдекешов пен «ҚТЖ-Жүк тасымалы» ЖШС-нің Құрмет грамотасын еншілеген Алтынбек Әлмағамбетов бар.