2022 жылы теміржол бойындағы қауіпсіздік күшейтілмек

Биылғы жылдың соңына дейін «2022-2023 жылдарға арналған темір жолдағы мүліктің қауіпсіздігі мен сақталу деңгейін арттыру жөніндегі жол картасы» жобасы қабылдануы мүмкін, деп хабарлайды Rail-news.kz. «ҚТЖ» ҰК» АҚ мен ҚР ІІМ Көліктегі полиция департаменті бірлесіп әзірлеген құжатта кешенді заңнамалық және ұйымдастырушылық-техникалық іс-шаралар қарастырылған. Жол картасы «Әкімшілік құқық бұзушылық туралы» ҚР Кодексіне өзгерістер мен толықтыруларды енгізуді көздейді. Егер бұл мақсат іске асып жатса, онда темір жолдар арқылы рұқсат етілмеген жерлерден өткендерге, жол жиегіне мал жаю ережелерін бұзғандарға салынатын айыппұлдар көлемі артады. Сонымен қатар станциялар мен вокзалдарда қосымша бейнебақылау камераларын орнату да қарастырылған. Бүгінде 35 теміржол вокзалында үш мыңға жуық бейнебақылау камерасы жұмыс істейді. Ал алдағы жылы олардың қатарына тағы 22 станция қосылмақ. Бейнекамералар жолаушы пойыздарының вагон-мейрамханаларында да пайда болады. Локомотивтер сыртқы және ішкі бақылау бейнетіркеу құрылғыларымен жабдықталмақ. Қазірдің өзінде бейнебақылау жүйесі елордалық локомотив құрастыру зауытының конвейерінен шыққан 150 локомотивте орнатылған. KZ8A сериялы жаңа локомотивтерге бейнетіркеу функциясы бар «Борт» қозғалыс қауіпсіздігі жүйесін іске қосу жоспарлануда. Жол картасында адамдар мен малдың пойызға басылуы жайттарының алдын алу іс-шараларына баса назар аударылған. Азаматтардың теміржол арқылы қауіпсіз қозғалысын қамтамасыз ету үшін жергілікті әкімдіктермен бірлесіп, елді мекендерде жаяу жүргіншілер өткелдері пен көпірлер салу қарастырылмақ. Жыл сайын 10-15 станцияда қосымша жаяу жүргіншілер төсемдері салынады. Сондай-ақ, теміржолдың қауіпті аймақ екенін ескертетін белгілер орнатылып, ескілері жаңартылып тұрады. Биылдың өзінде 700-ге жуық ескерту белгісі жаңаланған. Соған қарамастан адамдардың жолдан өту, яғни қауіпсіздік ережесін өрескел бұзуы азаймай отырғаны теміржолшылар мен көлік полициясы қызметкерлерін алаңдатып отыр.