5 жылда Құрық порты арқылы 2018 кеме өткен
«Қазақстан теміржолшысы» газетінің тілшісі
Желтоқсан айында Құрық портының ашылып, қызметін бастағанына бес жыл толды, деп хабарлайды Rail-news.kz. Осы қысқа мерзім ішінде «Құрық порты» қарт Каспий айдынындағы көшбасшы кәсіби компанияға айналды. Қазіргі уақытта порттың паромдық кешені арқылы қазақстандық астық, көмір, мұнай өнімдері, тыңайтқыш, химикаттар экспортқа жөнелтілуде. Ал шетелден портқа келетін жүктер қатарын азық-түлік өнімдері, өнеркәсіптік жабдықтар, құрылыс материалдары, тағы басқалары құрайды. Каспийдің шығыс жағалауында орналасқан порт арқылы барлығы 2018 кеме өткен, ауыстырылып тиелген жүк көлемі 6,017 млн тоннадан асқан. Ағымдағы жылдың соңғы 10 айында 866,743 мың тонна жүк және 368 кеме өңделіпті. Порт кадрлармен толық қамтылған және 160 адамнан тұрады. Олардың басым бөлігін жергілікті мамандар құрайды. «Құрық порты» ЖШС бас директоры Серік Ахметов бастаған ұжым компанияның 5 жылдық мерейтойын қайырымдылық акцияларымен атап өтті. Порттың туған күніне техникалық және пайдалану блоктарының қызметкерлері жұмыс процесінен қызықты бейнеролик жасап, естелік қалдырды. Сонымен қатар паром кешенінің үздік қызметкерлері марапатталып, айтулы датаға орай өткізілген спорттық жарыстардың жеңімпаздарына сый-сияпаттар табыс етілді.