Елімізден Ауғанстанға 6 вагон гуманитарлық жүк жеткізілді
«Қазақстан теміржолшысы» газетінің тілшісі
«Қазақстан темір жолы» ҰК» АҚ еншілес ұйымы KTZ Express тарапынан Ауғанстан Ислам Республикасына қазақстандық гуманитарлық көмекті жеткізу ұйымдастырылды.
«KTZ Express» АҚ Қазақстан Республикасы Үкіметінің 2021 жылдың 24 желтоқсанындағы №930 «Ауғанстан Ислам Республикасына ресми гуманитарлық көмек көрсету туралы Қаулысына сәйкес азық-түлік өнімдері мен медициналық дәрі-дәрмектер, палаткалар тиеген 6 жабық вагонның жөнелтілімін ұйымдастырды. Қазақстанның Құлайғыр, Қырқыншы, Ақтөбе-2, Шымкент және Алматы-1 станцияларында жасақталған пойыздар ауғандық Хайратон теміржол станциясына еш кедергісіз жеткен. Жүкті жөнелтушілер ҚР Төтенше жағдайлар министрлігінің мемлекеттік материалдық резерв жөніндегі комитетінің «Резерв» шаруашылықты жүргізу құқығына ие республикалық мемлекеттік кәсіпорын және «СК-Фармация» ЖШС болып табылады.
Жүк жөнелтушілердің айтуынша, ауған халқының тұрмыстық жағдайын жақсартуға бағытталған гуманитарлық жөнелтілімдер бұдан былай тұрақты және жүйелі түрде жүзеге асырылатын болады.
Жалпы Қазақстан мен Ауғанстан елдері арасында екі жақты сауда айналымы жақсы жолға қойылған. Қазақстан өз тарапынан ауған еліне жүк көлемі мен тауарлар тізімін кеңейтуге мүдделілік танытуда. Осы ретте, біздің ел Ауғанстанға астық пен ұнның негізгі жеткізушісі болып табылатынын айтып өтейік. Экспортталатын қазақ ұнының басым бөлігі және астықтың 10% астамы ауған нарығына бағытталған. Еске сала кетсек, өткен жылдың қаңтар-қазан аралығында екі ел арасындағы сауда айналымы 345,9 млн АҚШ долларын құраған.