Оқушылар Жаңаесіл локомотив пайдалану депосына экскурсия жасады
«Қазақстан теміржолшысы» газетінің тілшісі
Ақмола жүк тасымалы бөлімшесіне қарасты Жаңаесіл локомотив пайдалану депосына жергілікті орта мектептің жоғары сынып оқушылары экскурсия жасады.
Мақсат – оқушыларды кәсіптік бағдарлау, темір жол мамандықтарымен таныстыру, сондай-ақ темір жолдағы жүріс-тұрыс нормаларын түсіндіру және жол бойында балалар жарақатына жол бермеуді көздейді.
Өндірістік қауіпсіздік және экология секторының бастығы Карина Мұхтарова оқушыларды жеке қорғаныс құралдарымен қамтамасыз етіп (ескертпелік белгісі бар кеудеше мен каска) және міндетті түрде нұсқамадан өткен соң барып депоға алып кіріп, өндіріспен таныстырды.
– Балалар темір жолдағы ең маңызды мамандықтардың бірі – машинист жұмысымен жіті танысты. Олар локомотив бригадаларының рейс алдындағы дайындығын, локомотивке техникалық қызмет көрсету процесінің жүріп жатқанын көріп, техникалық сабақтар өткізілетін класқа барды. Электровозға көтеріліп, машинист кабинасын көруге ықылас танытқандарға мүмкіндік беріліп, олар басқару пультін көзбен көріп, қолмен ұстады. Сонымен қатар, пойыздар қозғалысы аймағында жауапсыздық салдары жазатайым жайттарға әкелетінін нақты мысалдармен түсіндірдік, – дейді Карина Мұхтарова.