Табиғи монополиялар бойынша реттелетін қызметтердің осы жылғы жоспары қаралды

«ҚТЖ» ҰК» АҚ-да табиғи монополиялар саласында реттеліп көрсетілетін қызметтерді ұсыну бойынша 2021 жылғы қызметінің қорытындылары мен 2022 жылға арналған негізгі міндеттері жөніндегі қоғамдық тыңдау заңнамаға сәйкес, онлайн конференц-байланыс форматында өтті.

Оған ҚР ҰЭМ Табиғи монополияларды реттеу комитетінің, заңды тұлғалар бірлестіктерінің, өнеркәсіптік қауымдастықтардың өкілдері, жеке тасымалдаушылар және өзге де қызмет тұтынушылары қатысты. Отырысқа төрағалық еткен ҚТЖ-ның қаржы жөніндегі басқарушы директоры Даир Көшеров компания өз қызметінің тиімділігін арттыру үшін қызмет тұтынушыларымен қарым-қатынаста ашық саясат жүргізетінін атап өтті.

«ҚТЖ» ҰК» АҚ – «Магистральдық желі дирекциясы» филиалы директорының экономика және қаржы жөніндегі орынбасары Александр Кирович магистральдық теміржол желісі қызметтерін көрсету саласындағы субъект және жұмыс көрсеткіштері туралы хабардар етті. Сондай-ақ ол ұсынылған қызметтер көлемін орындау мен сапасын арттыру, инвестициялық бағдарламаларды іске асыру, негізгі қаржы-экономикалық көрсеткіштерге қол жеткізу және қызмет перспективалары, тарифтік сметаның баптар бойынша орындалуы мен қызмет тұтынушыларымен жүргізілетін жұмысы туралы баяндап берді. Оның айтуынша, реттелетін қызметтердегі жүк айналымы (экспорт, импорт, ішкі қатынас) 193 732 млн т-км құрап, жолаушылар вагондарының қозғалысы 622 948 мың вагон-км жеткен.

Өткен жылы Магистральдық темір жол желісінің реттеліп көрсетілетін қызметтерінен түскен кірістер 333 млрд теңгені, ал реттелетін қызметтер бойынша 2021 жылы инвестициялардың жалпы көлемі 95 млрд теңгені құраған. 2021 жылы компания салған инвестициялар темір жол көлігімен жүк тасымалдау қажеттіліктерін қанағаттандыруға, темір жол көлігінің үздіксіз жұмысын қамтамасыз етуге, жекелеген учаскелерде пойыздар қозғалысының жылдамдығы мен айналымдылығын арттыруға мүмкіндік берді.

Жиында «Магистральдық желі дирекциясы» филиалының экономика жөніндегі атқарушы директоры Ерлан Қизатов кірме жолдарды ұсыну, электр энергиясын беру жөніндегі реттеліп көрсетілетін қызметтерді көрсету бойынша есеп берді. Негіздемелері бар толық есеп www.railways.kz сайтының «Инфрақұрылым» бөлімінде орналастырылған.